Shefja e UN Women të hënën i kërkoi komunitetit ndërkombëtar të rrisë fondet për organizatat e udhëhequra nga gratë që punojnë në zonat e konfliktit, duke paralajmëruar se rënia e mbështetjes financiare kërcënon progresin e bërë në kuadër të axhendës së Grave, Paqes dhe Sigurisë (WPS).
Duke folur në një seancë të Këshillit të Sigurimit të OKB-së që shënoi 25-vjetorin e ardhshëm të Rezolutës 1325, Drejtoresha Ekzekutive e UN Women, Sima Bahous, tha se bota po përballet me “shpenzime ushtarake në rritje dhe kundërshtim të rinovuar kundër barazisë gjinore dhe multilateralizmit”, të cilat ajo paralajmëroi se “kërcënojnë vetë themelin e paqes dhe sigurisë globale”.
Bahous tha se, pavarësisht “angazhimeve të guximshme dhe të admirueshme”, 25 vitet e fundit kanë dëshmuar “zbatim të dobët dhe mungesë kronike të investimeve” në pjesëmarrjen e grave në proceset e paqes, shkruan AA, transmeton KosovaPress.
“Sekretarja e përgjithshme sapo foli për mënyrën se si trendet aktuale të financimit po rrezikojnë qëndrueshmërinë dhe sigurinë e organizatave të udhëhequra nga gratë në vendet e prekura nga konflikti”, tha ajo. UN Women beson, shtoi ajo, “nuk ka alternativë tjetër përveçse të ndryshohet kursi dhe të investohet ndjeshëm në organizatat e grave në vijën e parë të konfliktit”.
Duke pranuar vuajtjet e shkaktuara nga luftërat dhe zhvendosjet e vazhdueshme, Bahous tha: “Pavarësisht tmerreve të luftërave dhe konflikteve, gratë vazhdojnë të ndërtojnë paqen”.
Ajo iu bashkua Sekretarit të Përgjithshëm të OKB-së, Antonio Guterres, në mirëpritjen e “përgjigjeve pozitive ndaj propozimit të Presidentit Donald Trump për t’i dhënë fund luftës në Gaza”, duke bërë thirrje për një armëpushim të qëndrueshëm, lirimin e të gjithë pengjeve dhe akses humanitar.
Duke përshkruar pesë prioritete kryesore, Bahous kërkoi “veprime afirmative për të siguruar që gratë të zënë vendin e tyre të merituar në tryezat e paqebërjes”, për t’i dhënë fund dhunës dhe pandëshkueshmërisë ndaj grave dhe për të siguruar që masat e llogaridhënies “t’i bëjnë dështimet të dukshme dhe të kenë pasoja”.
“Kur gratë udhëheqin, paqja vjen pas”, tha ajo, duke vënë në dukje: “Ne u bëmë një premtim atyre 25 vjet më parë; është koha për ta përmbushur.”
Burimi: botasot.info
