Zjarri në një banesë në Pejë çon 13 persona në spital me probleme në frymëmarrje

Trembëdhjetë persona janë pranuar të premten në Spitalin e Përgjithshëm të Pejës me probleme të frymëmarrjes, si pasojë e tymit të një zjarri që shpërtheu në një banesë në qytet.

Sipas njoftimit të Spitalit, shtatë prej tyre janë fëmijë dhe po trajtohen në Repartin e Pediatrisë, ndërsa gjashtë pacientët e tjerë po marrin trajtim në Emergjencë.

“Gjatë ditës së sotme në Spitalin e Përgjithshëm në Pejë janë pranuar 13 pacientë me probleme në frymëmarrje, siç dyshohet, të shkaktuara nga tymi i një zjarri të ndodhur në një banesë në qytet. 7 pacientë po trajtohen në Repartin e Pediatrisë, ndërsa 6 pacientë të tjerë në Emergjencën e Spitalit tonë”, thuhet në njoftimin zyrtar.

Spitali bëri të ditur se gjendja e të gjithë pacientëve është stabile dhe pritet që ata të lirohen pas përfundimit të trajtimit mjekësor.