Zjarr masiv në Kanada, mbi 22 mijë persona urdhërohen të evakuohen

Mbi 22 mijë persona janë urdhëruar të largohen nga banesat e tyre në British Columbia të Kanadasë, ndërsa rreth 9,700 të tjerë janë paralajmëruar të jenë të gatshëm për evakuim, për shkak të zjarreve të fuqishme që po përhapen me shpejtësi.

Situata ka detyruar autoritetet provinciale të shpallin gjendjen e jashtëzakonshme, pasi më shumë se 100 vatra zjarri janë aktive në British Columbia dhe rreth gjysma e tyre vijojnë të jenë jashtë kontrollit. Temperaturat e larta, erërat e forta dhe thatësira e zgjatur kanë krijuar kushte veçanërisht të favorshme për përhapjen e flakëve.

Kryeministri i British Columbia-s, David Eby, tha se situata është jashtëzakonisht serioze, ndërsa ekipet e emergjencave po punojnë për evakuimin dhe shpëtimin e banorëve.

“E di që shumë familje po përballen me një ditë të paimagjinueshme sot. Njerëzit kanë humbur shtëpitë e tyre. Dhe shumë njerëz janë zhvendosur. Të tjerë po presin lajme për të dashurit e tyre”, deklaroi Eby.

Një nga zonat më të prekura është komuniteti i Summerland, me rreth 12 mijë banorë, i cili u urdhërua i tëri të evakuohej gjatë natës. Ndërkohë, rreth 8 mijë persona në zonën e Peachland dhe përreth saj morën gjithashtu urdhër për t’u larguar. Autoritetet ende nuk kanë një bilanc të saktë për numrin e banesave të shkatërruara.

Zjarri i Bald Range u raportua për herë të parë të premten në mbrëmje dhe u përhap me një shpejtësi të jashtëzakonshme. Brenda pak orësh, flakët përfshinë rreth 50 kilometra katrorë, duke arritur deri në zonën e Summerland, rreth 15 kilometra larg.

Drejtori i operacioneve të zjarreve në Shërbimin e Zjarrfikësve të British Columbia-s, Cliff Chapman, i përshkroi kushtet si “shpërthyese”, ndërsa kryeministri Eby tha se një zyrtar i zjarrfikësve e kishte krahasuar zjarrin me “një bombë që shpërthen”.