Një ndërtesë trekatëshe u shemb të martën në mbrëmje në qytetin Benetússer, pranë Valencias, në Spanjë.
Fatmirësisht, nuk pati të lënduar, pasi banorët ishin evakuuar vetëm pak minuta para shembjes, pasi kishin vënë re çarje në mure dhe kishin dëgjuar zhurma të pazakonta.
Sipas Departamentit të Zjarrfikësve të Valencias, alarmi u dha rreth orës 22:01 nga banorët e rrugës Las Américas, të cilët raportuan çarje në ndërtesë dhe tinguj që ngritën dyshime për rrezik shembjeje.
Sipas gazetës El Pais, ndërtesa përbëhej nga një kat përdhes dhe tre kate banimi, me nga një apartament në secilin kat. Ajo ndodhej pranë një parcele ku po zhvillohen punime ndërtimi për një godinë tjetër.
Në vendngjarje mbërritën ekipe zjarrfikësish si edhe drejtues të Shërbimit të Zjarrfikësve. Kur ekipet mbërritën, banorët e kishin braktisur tashmë ndërtesën. Pas krijimit të një perimetri sigurie, godina u shemb plotësisht vetëm pak minuta më vonë.
Autoritetet konfirmuan se askush nuk mbeti i bllokuar nën rrënoja dhe nuk pati të lënduar.
Si masë parandaluese, u evakuua edhe një ndërtesë tjetër pranë vendit të ngjarjes, në pritje të inspektimeve nga teknikët e Bashkisë së Benetússerit. Zjarrfikësit po bashkëpunojnë me autoritetet lokale, si edhe me kompanitë e furnizimit me gaz dhe energji elektrike, për të garantuar sigurinë në zonë.
Shkaqet e shembjes janë ende nën hetim, ndërsa mediat lokale raportojnë se pranë ndërtesës po zhvilloheshin punime ndërtimi, pa u konfirmuar ende nëse ato kanë lidhje me incidentin.
Un edificio de tres plantas ubicado en Benetússer (Valencia) se ha desplomado en la noche de este martes sin causar daños personales. Minutos antes, los vecinos habían abandonado el inmueble tras detectar grietas y escuchar ruidos https://t.co/W0BqYMnJY5 pic.twitter.com/xp23UKYpj9
— EL PAÍS (@el_pais) July 15, 2026
Burimi: botasot.info
