Koalicioni i qendrës së majtë i udhëhequr nga kryeministri i Partisë Laburiste, Jonas Gaard Støre do të mbetet në pushtet në Norvegji pas fitores në zgjedhjet parlamentare në vendin e Evropës Veriore, të cilat u shënuan nga rritja e së djathtës populiste anti-imigracion, e cila shënoi rezultatin e saj më të lartë në historinë e saj.
Në një garë që u përqendrua në çështjet kombëtare, fuqia blerëse dhe standardet e jetesës, pabarazitë, shërbimet publike, por nuk ishte imun ndaj trazirave gjeopolitike, koalicioni i qendrës së majtë ishte në rrugën e duhur për të siguruar një shumicë të ngushtë vendesh 87 nga 169 në parlament, me pothuajse të gjitha fletët e votimit të numëruara.
Partia Laburiste mori 28.2% të votave, sipas Komisionit Kombëtar Zgjedhor Norvegjez. Partia populiste e Progresit shënoi një rritje spektakolare (+12.3%) krahasuar me vitin 2021 dhe performancën e saj më të mirë në histori, pjesërisht e nxitur nga “efekti Trump”, duke siguruar 23.9% të votave. Ajo del si forca e dytë politike në Norvegji: Partia Konservatore nën ish-kryeministren Erna Solberg u radhit në vendin e tretë, me 14.6%.
“E dinim se do të ishin zgjedhje të ngushta, dhe ashtu ishte. E dinim se duhej të jepnim gjithçka nga vetja, dhe e dhamë. Ia dolëm!”, u tha Gar Stere mbështetësve të tij.
Në pushtet që nga viti 2021, udhëheqësi 65-vjeçar i Partisë Laburiste ka siguruar në mënyrë efektive një mandat të dytë katërvjeçar si kreu i një qeverie minoritare, një dukuri e zakonshme në Skandinavi.
Rreth 4 milionë nga 5.6 milionë banorët e vendit të pasur kishin të drejtë vote të dielën. Pjesëmarrja ishte 78.9%, sipas shifrave të përkohshme nga komisioni zgjedhor.
Rezultatet zyrtare përfundimtare pritet të bëhen publike në ditët në vijim.
Top Channel
Burimi: top channel
