Zgjedhjet do e paralizojnë shtetin!

1

Shkup, 11 gusht – Shpallja e zgjedhjeve lokal të cilat do të mbahen me 19 tetor 2025, thuajse e paralizon shtetin. Edhe pse bëhet fjalë për zgjedhje të kryetarëve të komunave, sërish shumë prosece do të mbeten të “ngrira” dhe çdo gjë do të funksionojë nomralisht vetëm pasi të mbyllen zyrtarisht zgjedhjet. Kjo formë e funksionimit, në emër të demokracisë, vazhdimisht po shkakton dëme të mëdha në funksionimin e shtetit, shrkuan “Zhurnal.mk”.

Gashi shpalli zgjedhjet!

Kryetari i Kuvendit të Maqedonisë së Veriut, Afrim Gashi, nënshkroi Vendimin për shpalljen e zgjedhjeve të teta lokale në përputhje me nenin 12, paragrafi 4 të Kodit Zgjedhor, duke respektuar afatin prej 70 deri në 90 ditë nga shpallja deri në mbajtjen e zgjedhjeve.

Me shpalljen e zgjedhjeve fillojnë të ecin afatet për kryerjen e aktiviteteve zgjedhore, në përputhje me Kodin Zgjedhor dhe sipas kalendarit që do të miratohet nga Komisioni Shtetëror i Zgjedhjeve. Raundi i parë i zgjedhjeve për kryetarë bashkish dhe anëtarë të këshillave të 80 komunave dhe Qytetit të Shkupit do të mbahet më 19 tetor, ndërsa raundi i dytë i zgjedhjeve për kryetar bashkie është planifikuar të mbahet më 2 nëntor, në njësitë e qeverisjes vendore në të cilat zgjedhjet nuk do të përfundojnë në raundin e parë.

Sipas orarit të KSHZ-së, inspektimi i Listës Zgjedhore do të fillojë 15 ditë pas shpalljes së zgjedhjeve dhe do të zgjasë 20 ditë. Afati i fundit për dorëzimin e listave të kandidatëve për kryetarë komunash dhe këshilltarë është 15 shtatori. Buxheti total për zgjedhjet është 9.76 milionë euro, dy të tretat e të cilave janë ndarë për mbulim mediatik dhe reklama politike të paguara. Kjo shumë nuk përfshin tarifat për anëtarët e bordeve zgjedhore dhe kostot e transportit të materialeve zgjedhore, të cilat janë përgjegjësi e qeverive vendor.

Deputetët do të “flejnë” gjatë zgjedhjeve!

Me shpalljen e zgjedhjeve, si gjithmonë, thuajse i gjithë shteti paralizohet. Zyrtarisht, gjatë fushatës zgjedhore, e cila fillon 20 ditë para zgjedhjeve, Parlamenti do të vazhdojë me funksionimin e rregullt administrativ, por nuk do të mbajë seanca plenare.

Me këtë vendim synohet të shmanget keqpërdorimi i foltores parlamentare për qëllime zgjedhore dhe t’u mundësojë deputetëve t’i përkushtohen plotësisht komunikimit me qytetarët.

Kjo nënkupton se gjatë këtyre ditëve sa do të mbahet fushata zgjedhore nuk do të ketë asnjë seancë plenare, ndërsa deputetët edhe pse do të marrin rrogë, ata do të jenë të lirë të veprojnë si të duan, kuptohet pa pasur ndikim në fjalime përçarëse dhe pengesa të ndryshme.

Nga ana tjetër edhe ministrat janë në pushim vjetor nga 5-15 gushti, por edhe pse do të kthehen në punë të hënën me 18 gusht, ata për shkak të zgjedhjeve do t’i kenë duart e lidhura. Nuk do të mund të ndërmarrin asnjë vendim të rëndësishëm, sepse çdo veprim që ka të bëjë me financa, do të konsiderohet si “mundësi” për ndikim në zgjedhje.

Realiteti nga zgjedhjet e deritanishme është thuajse krejt i ndryshëm. Ajo që shkruhet në letër thuajse nuk respektohet aspak. Deputetët dhe ministrat edhe pse nuk grojnë për postet e tyre, ata marrin urdhëra nga partitë e tyre përkatëse që të vrapojnë derë më derë me kandidatët e tyre për deputet për të fituar vota, për të tentuar që të bindin qytetarët se bashkëpartiakët e tyre janë më të mirët. Shpesh herë përdorin veturat e tyre zyrtare për aktivitete partiake, ndërsa përfshihen edhe në fjalim përçarëse, presione politike dhe përdorin të gjitha metodat vetëm e vetëm që t’ia arrijnë qëllimit të tyre.

Partitë, deputetët dhe ministrat duhet të kuptojnë se ky është një proces që duhet të përqendrohet te qytetari, te nevojat dhe sfidat e tij reale, si dhe te zgjidhjet konkrete që duhet të ofrojë secili kandidat, shkruan “Zhurnal.mk”.