Presidenti ukrainas Volodymyr Zelensky ka njoftuar se ka zhvilluar një bisedë me kryeministrin britanik Keir Starmer, ku kanë diskutuar “përpjekjet e përbashkëta diplomatike” dhe planet për një takim të koalicionit të vullnetarëve në Romë, i cili pritet të mbahet “brenda pak ditësh”.
“Po punojmë për të siguruar që vendimet që do të merren të jenë sa më të forta të jetë e mundur”, tha Zelensky.
Më tej, ai shtoi se Starmer shprehu ngushëllimet e tij për sulmet e vazhdueshme ruse ndaj Ukrainës, ndërsa diskutuan edhe mënyra të tjera për të mbështetur vendin e tij.
“Ne diskutuam gjithashtu fonde shtesë që do të ofrohen këtë muaj për prodhimin vendas të dronëve në Ukrainë, kryesisht për dronë interceptues”, tha Zelensky.
Udhëheqësi ukrainas përmendi gjithashtu se ata ranë dakord të punojnë për forcimin e formateve të tjera të bashkëpunimit me partnerët kryesorë, veçanërisht formatin Ramstein, me fokus në mbrojtjen e hapësirës ajrore dhe përmirësimin e aftësive të mbrojtjes ajrore të Ukrainës.
Ndryshe, Rusia ka humbur 1,027,540 trupa në Ukrainë që nga fillimi i agresionit të saj në Ukrainë më 24 shkurt 2022, raportoi Shtabi i Përgjithshëm i Forcave të Armatosura të Ukrainës.
Burimi: botasot.info
