Çairi hyn në një epokë të re zhvillimi me projektin më kapital që është realizuar ndonjëherë në këtë komunë. Zëvendësministrja e Transportit, Kaltrina Zekolli Shaqiri, ka bërë të ditur se është hapur thirrja për tenderimin e fazës së tretë të sheshit “Skënderbeu”, një investim historik prej mbi 25 milionë eurosh, që përfshin edhe ndërtimin e parkingut modern nëntokësor.
“Ky projekt madhor do t’i japë sheshit “Skënderbeu” një funksion tërësisht të ri, duke e transformuar në një hapësirë të hapur për qytetarët, të përshtatshme për tubime, manifestime dhe ngjarje kulturore. Me këtë ndërhyrje, parkimi mbi sipërfaqe do të zhduket, duke u zëvendësuar me një shesh bashkëkohor që gjallëron jetën publike në Çair,” ka shkruar Zekolli-Shaqiri.
Sipas zv/ministres së Transportit, parkingun e ri nëntokësor do ta përbëjnë dy nivele me sipërfaqe prej 12.520 metrash katrorë dhe kapacitet për mbi 400 automjete. Ky standard modern do të zgjidhë përfundimisht problemin e mungesës së vendeve të parkimit në zonën e Çarshisë, duke përmirësuar qasjen dhe duke nxitur funksionin tregtar e kulturor të njërës prej zonave më të rëndësishme të kryeqytetit.
“Investimi financohet tërësisht nga Qeveria dhe Ministria e Infrastrukturës, për shkak të përmasave dhe rëndësisë së veçantë të projektit. Ky është shembulli më i mirë i qeverisjes sonë me përgjegjësi. Ne nuk bëjmë vetëm premtime, por realizojmë vepra që e modernizojnë Çairin dhe e bëjnë një komunë të denjë për qytetarët e saj,” ka shkruar më tej Zekolli-Shaqiri.
Zëvendësministrja e Transportit dhe Lidhjeve, Kaltrina Zekolli Shaqiri gjithashtu ka thënë se me këtë projekt transformues, Çairi bëhet më modern, më funksional dhe në shërbim të përditshmërisë së çdo qytetari.
