Zbardhen detaje nga aksioni kundër fajdesë në Prizren, tre të arrestuar – njëri goditi një 17-vjeçare gjatë ikjes

Tre persona janë arrestuar në Prizren nën dyshimin për përfshirje në veprën penale të fajdesë.

Raportohet se tre të arrestuarit gjatë aksionit kundër fajdesë janë Fadil Selimi, Beqir Selimi (vëllezër) dhe Arsim Dogani.

Gjatë aksionit për arrestimin e të dyshuarve, njëri prej tyre dyshohet se nuk është ndalur me automjet dhe ka vazhduar ikjen.

Sipas zëdhënësit të Policisë për rajonin e Prizrenit, Shaqir Bytyqi, gjatë ikjes i dyshuari ka goditur me automjet një 17-vjeçare.

“Gjatë ikjes, i njëjti ka goditur një këmbësore, femër, 17-vjeçare, e cila, sipas vlerësimit të mjekëve, ka pësuar lëndime dhe është jashtë rrezikut për jetë”, ka deklaruar Bytyqi.

Beqir Selimi

Po gjatë ikjes, i dyshuari dyshohet se ka goditur edhe një zyrtar policor, hetues nga Drejtoria e Përgjithshme e Policisë në Prishtinë.

“Po gjatë ikjes, i dyshuari ka goditur edhe një zyrtar policor, hetues nga Drejtoria e Përgjithshme e Policisë në Prishtinë, i cili ka pësuar lëndime të lehta trupore. Pas veprimeve të ndërmarra nga zyrtarët policorë, i njëjti është ndaluar dhe arrestuar”, tha Bytyqi.