VMRO-DPMNE: Maqedonia po hyn në një epokë të re dixhitale

1

Shkup, 5 korrik – Maqedonia po përjeton një transformim dixhital rrënjësor, falë reformave të qeverisë së udhëhequr nga VMRO-DPMNE, thuhet në një deklaratë zyrtare të kësaj partie.

Sipas partisë në pushtet, qeveria aktuale trashëgoi një sistem të prapambetur dixhital nga qeverisja paraprake e LSDM-së, por brenda një viti ka hedhur hapa të rëndësishëm drejt modernizimit të administratës publike dhe shërbimeve për qytetarët.

120 shërbime të reja elektronike janë vënë tashmë në dispozicion përmes portalit kombëtar uslugi.gov.mk, përfshirë certifikatën e lindjes, të shtetësisë, të penalitetit dhe dokumentin për blerjen e armëve – të gjitha të vlefshme në formë elektronike.

Për të garantuar vlefshmërinë juridike të këtyre dokumenteve, janë bërë ndryshime në Ligjin për Dokumentet Elektronike.

Gjithashtu, janë hapur qendra të reja administrative për ndihmë ndaj qytetarëve në Aerodrom, Jegunovcë dhe Shtip, duke ofruar mbi 300 shërbime publike edhe për ata që nuk kanë akses në internet apo aftësi për përdorimin e teknologjisë.

Në aspektin e sigurisë, për herë të parë në vend është miratuar Ligji për Sigurinë Kibernetike, i cili synon të mbrojë rrjetet dhe sistemet e informacionit nga sulmet kibernetike.

Po ashtu, është miratuar një Ligj i ri për Median, që njeh zyrtarisht mediat online pas më shumë se 12 vitesh boshllëk ligjor.

Një tjetër masë e rëndësishme është ndalimi i 226 organizatorëve të paligjshëm të lojërave të fatit online, që sipas qeverisë kanë ndikuar negativisht te të rinjtë dhe paraqesin rrezik për sigurinë personale dhe financiare.

Në kuadër të strategjisë së dixhitalizimit, është paralajmëruar për në tetor 2025 lansimi i një Super Aplikacioni Qeveritar (SuperApp), që do të mundësojë akses të qytetarëve në dokumente si kartë identiteti dhe patentë në formë elektronike, si dhe portale të unifikuara dhe të sigurta për institucionet publike.

“Ne po ndërtojmë themelet e ndryshimit”, përfundon deklarata e VMRO-DPMNE-së.