VMRO-DPMNE do ta mbështesë interpelancën për prokurorin publik Kocevski

1

Shkup, 29 korrik – VMRO-DPMNE do ta mbështesë interpelancën për punën e Prokurorit publik republikan – Ljupço Kocevski, të dorëzuar nga e Majta opozitare.

Koordinatori i grupit parlamentar të VMRO-DPMNE-së, Nikolla Micevski në konferencën e sotme për shtyp theksoi se më nuk ka hapësirë për kompromise me mossuksesin dhe se është koha për përgjegjësi.

“Institucionet, në bashkëpunim me prokurorinë, kanë heshtur për vite me radhë përballë skandaleve të mëdha, shumë prej të cilave u shkaktuan nga kreu i LSDM-së dhe BDI-së, të cilat janë të njohura mirë për publikun. Ato raste nuk janë harruar dhe nuk duhet të harrohen – por ato janë ende një plagë e hapur e kësaj shoqërie sot. Dhe prokuroria publike ka mbetur indiferente dhe pasive përballë këtyre burimeve të padrejtësisë. Kjo është arsyeja pse ne besojmë se mundësia që iu dha Ljupço Kocevskit tashmë është shpërdoruar. Mbështetja që ai mori nuk e justifikoi atë. Në vend të reformës dhe integritetit – morëm heshtje dhe servilizëm ndaj qeverisë që u mund nga populli. Prandaj, VMRO-DPMNE do të mbështesë interpelancën, në interes të parimeve, qytetarëve dhe drejtësisë. Nuk ka më vend për kompromise me dështimin. Është koha për përgjegjësi”, tha ai.

Micevski thekson se angazhimi i tyre për një luftë pa kompromis kundër korrupsionit dhe krimit të organizuar mbetet i fortë, konsistent dhe i qartë.

“Pavarësisht dallimeve thelbësore dhe serioze që ekzistojnë midis VMRO-DPMNE-së dhe partisë politike e Majta – veçanërisht në aspektin e kursit të tyre politik dhe bashkëpunimit me LSDM-në – angazhimi ynë për një luftë pa kompromis kundër korrupsionit dhe krimit të organizuar mbetet i vendosur, konsistent dhe i qartë. Kjo luftë nuk duhet të varet nga llogaritjet politike ose nga partnerët aktualë në opozitë ose qeveri. Kjo luftë duhet të udhëhiqet nga parimet dhe bindjet – se shteti më në fund duhet të fitojë një sistem prokurorial funksional, të pavarur dhe të guximshëm, i cili nuk do të heshtë përballë krimit të dukshëm, i cili nuk do të dridhet përballë presionit politik dhe i cili nuk do të bëhet bashkëpunëtor i atyre që e minuan shtetin”, deklaroi ai.

Sa i përket largimit të Kocevskit nga detyra pas interpelancës së votuar, Micevski theksoi se plotësisht do të kenë qëndrim për këtë çështje.

“Të presim fillimisht të kalojë interpelanca, që plotësisht të kemi qëndrim për këtë punë. Gjithsej, do të jetë sipas ligjeve dhe procedurave të cilat ekzistojnë në shtet”, tha ai.

Në pyetjen nëse do të arrijë Kuvendi t’i zgjedhë drejtuesit e tre institucioneve të rëndësishme deri në zgjedhjet lokale siç janë Prokuroria Publike, Avokati i Popullit dhe KSHPK, Micevski theksoi se të gjitha këto institucione kanë zëvendës.

“Këto janë procedura dhe veprime që tashmë janë iniciuar në disa institucione. Të presim që kjo procedurë të përfundojë në Parlament, dhe të shohim si do të zhvillohet më tutje. Nuk do të doja të komentoja diçka të tillë, sepse këto janë institucione që nuk varen vetëm nga një person. Janë institucione që kanë profesionistë tjerë të punësuar, zëvendës të cilët mund të përgjigjen në detyrat e shtetit. Nëse mbështetemi vetëm tek një person në shtet, nuk po na shkon puna mirë”, tha Micevski.