Ali Ahmeti vazhdon t’i nënçmojë shqiptarët. Letra e tij është përpjekja opozitare e njëqinda me rradhë për t’i zhvendosur gabimet dhe dështimet e veta në adresë tjetër. Plot 20 vite ishte në pushtet dhe, në vend që t’i zgjidhte në mënyrë sistematike të drejtat e shqiptarëve, la pas akte të paplota dhe të paqarta.
Sa herë që i konvenonte, me populizëm të zbrazët dhe deklarata të rreme, përhapte mjegull sikur të gjitha çështjet e të drejtave shqiptare ishin zgjidhur, ndërkohë që realiteti është krejt ndryshe.
Më e rëndësishme për ta ka qenë mbushja e xhepave privatë.
As koha e kësaj letre nuk është e rastësishme. Bëhet fjalë për një dredhi të re. Me truket e vjetra dhe të konsumuara, Ahmeti tenton të nxisë dhe t’i partizojë protestat e paralajmëruara të studentëve, të cilët kërkojnë të japin provimin e jurisprudencës në gjuhën e tyre amtare.
Në vend që t’i shkruajë letra vetëvetes, duhet t’u përgjigjet studentëve:
Pse ministri i tij, Jeton Shaqiri, gjatë mandatit të tij në arsim, lejoi që Universitetet shqiptare, sipas metodologjisë së ministrisë, të vlerësohen me koeficient më të ulët suksesi dhe njohurie krahasuar me Universitetin “Shën Qirili dhe Metodi”?
Pse lejoi diskriminim ndaj të diplomuarve shqiptarë?
Me këtë hipokrizi, siç e ka nisur, nuk do të ishte çudi që Ahmeti vetë të nxisë protesta studentore para selisë së Bashkimi Demokratik për Integrim.
Burimi: alfax.mk
