Kandidati i pavarur për kryetar të Komunës së Gostivarit, Visar Ademi, hapi zyrtarisht fushatën e tij zgjedhore me një tubim publik ku prezantoi vizionin dhe angazhimet e tij për të ardhmen e komunës. Para një audience të përzier, ai ndau rrugëtimin personal që e ka çuar drejt vendimit për të kandiduar, duke theksuar se që nga viti 2017 kishte pasur kërkesa të vazhdueshme nga qytetarët për t’u përfshirë në politikë.
“Që atëherë më thonin: ‘Pse Visar, i ke ndihmuar të gjithë, por me veten pse nuk e bën këtë hap?’,” tha Ademi në fjalën e tij. Ai kujtoi fillimet e angazhimit si kandidaturë e pavarur, të cilën e nisi me një ekip prej vetëm pesë vetash, duke e përshkruar si një periudhë me pasiguri dhe frikë të madhe për përkrahjen qytetare.
Në fjalimin e tij, Ademi solli dy momente që, sipas tij, e motivuan fuqishëm për të vazhduar: njëri ishte kur qytetarë e përkrahnin në heshtje, duke i thënë se do ta votonin, por duke shmangur ekspozimin publik për shkak të presioneve apo rrethanave personale. “Më thonin: ‘Mos kërko fotografi me mua, se kam fëmijë për të shkolluar, kam familje’, dhe i kuptoja,” u shpreh ai.
Momenti tjetër ishte një takim i papritur në supermarket me dy qytetare të moshuara. “Njëra prej tyre më pyeti nëse isha Visari i TikTok-ut. Kur i thashë po, më kapi duart dhe më tha: ‘Ti je e ardhmja e Gostivarit. Çdo natë lutem që të fitosh dhe të rregullosh këtë qytet’,” tha Ademi, duke shtuar se për të, beteja e vërtetë është fituar në momentin që kanë arritur të fitojnë zemrat e njerëzve.
Në programin e tij, Ademi tha se prioritet i tij është transformimi i Gostivarit në një komunë funksionale dhe të pastër, me institucione efikase dhe administratë të përkushtuar ndaj qytetarëve. Ai theksoi tri pika kyçe: rritjen e produktivitetit në administratë, eliminimin e papastërtive dhe menaxhimin e çështjes së qenve endacakë.
Ademi paralajmëroi gjithashtu se do të ketë një qasje të re në llogaridhënie. Ai u zotua që pas një viti do të organizojë një referendum qytetar për të vlerësuar performancën e tij. “Nëse qytetarët janë të pakënaqur, rrogën time do ta dhuroj për kauza sociale,” deklaroi ai. Po ashtu, premtoi masa për të ndihmuar të rinjtë të zhvillojnë aftësitë e tyre dhe të kontribuojnë në komunë.
“Unë nuk dua që të rinjtë të më falënderojnë që u jap punë, por të ndihen të vlerësuar që u jepet mundësia për të treguar çfarë dinë dhe mund të bëjnë,” u shpreh ai.
Në mesin e përkrahësve në ngjarje ndodhej edhe një qytetar maqedonase. Me respekt ndaj këtij gjesti, Ademi një pjesë të fjalimit të tij e mbajti në gjuhën maqedonase, duke theksuar përfshirjen dhe barazinë si vlera kyçe në qasjen e tij politike.
“Jam këtu për ta transformuar Gostivarin,” përfundoi ai, duke theksuar se angazhimi i tij është i pavarur nga partitë politike dhe se përfaqëson një zë të qytetarëve që kërkojnë ndryshim real.
