Reshjet e ditëve të fundit kanë shkaktuar përmbytje në disa zona të vendit, duke vënë në vështirësi shumë banorë. Uji ka depërtuar në shtëpi, ara dhe biznese, duke shkaktuar humbje të mëdha materiale. Situata më e rënduar është paraqitur në komunën e Malishevës, ku disa fshatra janë përballur me dëme të konsiderueshme. E pasdite, komuna përmes një komunikate ka njoftuar se gjendja emergjente ka përfunduar.
Moti i paqëndrueshëm dhe reshjet e vazhdueshme të shiut kanë sjellë pasoja serioze edhe në komunën e Malishevës. Në këtë komunë vërshimet kanë prekur dhjetëra familje, duke shkaktuar dëme të konsiderueshme materiale dhe duke rrezikuar pronat e banorëve.
Zonat më të prekura nga vërshimet në Malishevë kanë qenë fshatrat Turjakë e Damanek që gjenden pranë lumit Mirushë, gjë që ka bërë të rrezikohen edhe më shumë.
“Ne dame në njerëz shyqyr skena pas, po tokat na i ka marrë shiu, edhe uji nuk është i pijshëm”, tha Istref Zogaj nga fshati Turjakë.
Ndërkaq, familjes Krasniqi nga fshati Damanek, një natë më parë vërshimet ia kishin përfshirë shtëpinë, duke dëmtuar gjithçka në të.
Banorët që u prekën nga këto vërshime mbeten me shpresë se do t’u kompensohen dëmet materiale.
Në anën tjetër, në një përgjigje zyrtare nga komuna e Malishevës thanë se gjendja emergjente në këtë komunë ka përfunduar, megjithatë kryetari i Komunës së Malishevës, Ekrem Kastrati, së bashku me anëtarët e Shtabit Emergjent, kanë theksuar se situata është përcjellë me dëme të mëdha, veçanërisht në infrastrukturë, ekonomi familjare, biznese dhe prona private.
Burimi: botasot.info
