Shkup, 16 nëntor – Brenda 445 kontrolleve inspektuese të kryera gjatë dhjetë ditëve të fundit, Agjencia për Ushqim dhe Veterinari (AHV) ka shqiptuar 15 ndalesa për ushtrimin e veprimtarisë tek operatorët me ushqim, ndërsa 696 kilogramë ushqim i pasigurt nga furnizues të panjohur janë sekuestruar dhe asgjësuar, njofton AHV.

Kontrollet ishin përqendruar veçanërisht tek objektet në afërsi të shkollave fillore dhe të mesme, prej nga nxënësit më së shpeshti blejnë ushqim.

Gjatë kontrolleve inspektuese është konstatuar se 19 operatorë kanë hedhur në treg ushqim të pasigurt, tek 30 prej tyre janë vërejtur kushte të pakënaqshme higjienike, ndërsa nga numri i përgjithshëm i kontrolluarve, 26 operatorë nuk kanë qenë të regjistruar në AHV.

“16 operatorë nuk kanë pasur të zbatuara procedurat për Praktikë të Mirë Higjienike dhe Praktikë të Mirë Prodhimi, ndërsa 32 të tjerë nuk kanë kryer kontrollin e detyrueshëm shëndetësor–sanitar të të punësuarve. Tre operatorë nuk kishin realizuar dezinfektim, dezinsektim dhe deratizim të detyrueshëm në objekte, ndërsa 7 objekte nuk i plotësonin kushtet teknike për ushtrimin e veprimtarisë. Ushqim i paetiketuar si duhet është konstatuar te shtatë operatorë”, thuhet në njoftimin e AHV.

Për parregullsitë e konstatuara, AHV ka shqiptuar gjoba ndaj 77 operatorëve, me vlerë të përgjithshme prej 36.470 eurosh. Janë lëshuar gjithsej 103 vendime për eliminimin e mangësive dhe 23 vërejtje.

Burimi: zhurnal.mk