Kryeministri Edi Rama ka reaguar pas vendimit të Gjykatës Kushtetuese për mbylljen e TikTok, e cila e cilësoi vendimin si “cenim të lirisë së shprehjes”.
Në një reagim në X, kryeministri thotë se gjykata arsyeton se 90% përqind të prindërve dhe mësuesve, me të cilët u bë konsultim dhe kërkuan mbylljen, paskan qenë gabim.
Sipas tij, falë mbylljes arritën të merrnin masat e duhura me kompaninë dhe ta bënin sërish të aksesueshëm rrjetin social, ndërsa shton se “të ishte për Gjykatën Kushtetuese, s’do ishte mbyllur fare dhe as masat pozitive s’do kishin ardhur dot”.
Ai thotë se falë mbylljes, prindërit ndihen më të lehtësuar, ndërsa ironizon vendimin e Kushtetueses, se tani “shpifësit mund të ndjehen të inkurajuar”.
“Gjykata Kushtetuese mendoka që 90% e prindërve dhe mësuesve shqiptarë ishin gabim kur kërkuan mbylljen e TIKTOK-ut! Fatmirësisht ne e rihapëm TIKTOK-un falë mirëkuptimit që gjetëm tek kompania për masat extra që u morën prej saj, pikërisht falë mbylljes, se të ishte për Gjykatën Kushtetuese, s’do ishte mbyllur fare dhe as masat pozitive s’do kishin ardhur dot! Falë asaj mbylljes sot prindërit dhe mësuesit mund të jenë pakëz më të lehtësuar, ndërsa falë këtij vendimi që s’dua t’ia ve emrin që ka, shpifësit mund të ndjehen të inkurajuar!”, shprehet Rama.
Burimi: botasot.info
