Pas një mungese të gjatë prej dy vitesh nga intervistat dhe ekrani, Vesa Vllasaliu është rikthyer aty ku të vërtetat thuhen troç. Bukuroshja ishte e ftuar ekskluzive në Prive by Liberta Spahiu, duke vendosur t’u japë fund çdo thashethemi që ka qarkulluar kohët e fundit për jetën e saj private. E qeshur, e hapur dhe më e sinqertë se kurrë, ajo nuk la asgjë pa zbuluar përballë publikut.
Fokusi kryesor i bisedës ishte padyshim romanca e saj shumë e përfolur dhe kapitulli më i ri i jetës. Vesa ndau detaje të ëmbla nga njohja me Mirlindin, duke treguar se si lindi shkëndija mes tyre. Por surpriza më e bukur e këtij rrëfimi ishte kur ajo foli plot emocion për faktin se tashmë, prej dy muajsh, ajo gëzon epitetin më të ndier në botë, atë të nënës. Duke treguar se si e ka ndryshuar mëmësia, ajo rrezatonte një lumturi që fjalët vështirë ta përshkruajnë.
Megjithatë, vëmendja e ndjekësve ishte edhe tek titujt e fundit që pushtuan rrjetin për një krizë të mundshme në çift. A u ndanë vërtet Vesa dhe Mirlindi? Ajo ka një përgjigje të prerë për të gjitha portalet që nxituan të prodhonin lajme. Vesa mohoi kategorikisht çdo zë për ndarje, duke theksuar se nuk kanë qenë kurrë larg njëri-tjetrit. Sipas saj, i famshmi “unfollow” në rrjetet sociale ishte thjesht një veprim impulsiv, një çështje prej vetëm dy minutash, e cila u kap menjëherë dhe u kthye në një dramë të madhe nga mediat rozë.
Duket se nuk ka asnjë re të zezë në parajsën e tyre dhe dyshja vazhdon të jetë bashkë, tashmë si një familje e plotësuar dhe e lumtur. Për të dëgjuar të gjitha detajet e këtij rrëfimi të rrallë dhe emocionet që Vesa përcolli, ndiqni intervistën e plotë në videon e mëposhtme.
Burimi: botasot.info
