Presidenti amerikan Donald Trump po shqyrton mundësinë e rifillimit të bombardimeve ndaj Iranit, ndërsa administrata e tij po vlerëson edhe rrugën diplomatike për të shmangur një përshkallëzim të ri të konfliktit.
Sipas raportimeve mediatike, Trump ka zhvilluar dy takime me ekipin e sigurisë kombëtare, ku janë diskutuar tre skenarë: rifillimi i operacioneve ushtarake, vazhdimi i bllokadës detare dhe arritja e një marrëveshjeje me Teheranin.
Ndërkohë, Irani ka paraqitur përmes Katarit një propozim të ri për negociata, por kërkon plotësimin e shtatë kushteve, mes tyre heqjen e sanksioneve amerikane, lirimin e aseteve të ngrira dhe dëmshpërblime për dëmet e luftës. Teherani ka paralajmëruar se nuk do të rihapë Ngushticën e Hormuzit pa plotësimin e kërkesave.
Brenda administratës amerikane ka qëndrime të ndryshme për strategjinë ndaj Iranit. Zëvendëspresidenti J.D. Vance raportohet se mbështet një zgjidhje diplomatike, ndërsa drejtori i CIA-s dhe sekretari i Thesarit favorizojnë vazhdimin e presionit përmes bllokadës.
Në të njëjtën kohë, autoritetet iraniane kanë nisur shpërndarjen e tabletave të jodit për familjet që jetojnë pranë objekteve bërthamore, në kuadër të masave parandaluese ndaj një emergjence të mundshme radiologjike.
Shqetësim për përshkallëzimin e konfliktit ka shprehur edhe Iraku. Kryeministri Ali Faleh al-Zaidi i ka kërkuar Trumpit që territori irakian të mos përdoret si bazë për sulme kundër vendeve fqinje.
Deri tani, Uashingtoni nuk ka shpallur një vendim përfundimtar për rifillimin e bombardimeve, ndërsa përpjekjet diplomatike vijojnë.
Burimi:TV21
