Washington – Çfarë pritet të ndodhë të hënën nga ana e presidentit amerikan Donald Trump që mund ta tronditë Kremlinin? Trump ka paralajmëruar se do të bëjë një “njoftim të madh” që lidhet me Rusinë dhe Ukrainën. Kjo vjen pas kritikave të ashpra që i janë drejtuar Putinit për shkak të vazhdimit të agresionit rus. Tashmë, spekulohet për atë që Trump do të shpallë në fillim të javës – ndërkohë nga Moska vijnë sinjale kontradiktore.
Nga burime pro-ukrainase ka shpresë: “Për herë të parë pas javësh, nuk ka pasur raportime për sulme me dronë në territorin ukrainas. Herën e fundit kjo ndodhi natën e 8 majit,” shkruan rrjeti rusishtfolës anti-Putin “Nexta”.
A është ky një sinjal që Rusia po përpiqet të mos e zemërojë Trump-in përpara njoftimit të tij të madh të së hënës?
Nga ana tjetër, në Kiev mbizotëron skepticizmi: Deri më tani, paralajmërimet e Trump-it për masa kundër Putinit kanë mbetur pa pasoja konkrete.
Megjithatë, sipas televizionit amerikan CBS, Trump mund të dërgojë për herë të parë armë në Ukrainë që nuk janë miratuar më parë nga paraardhësi i tij, Joe Biden. Po ashtu, Trump ka në dorë një mjet tjetër për të ushtruar presion mbi Rusinë: kapitalin rus të ngrirë, që mund t’ia vë në dispozicion Ukrainës.
Në javët e fundit, kritikat e Trump-it ndaj Putinit janë shtuar, sidomos pas intensifikimit të sulmeve ruse dhe mungesës së interesit për një armëpushim. Trump ka paralajmëruar gjithashtu se do të dërgojë në Ukrainë raketa kundërajrore Patriot, të cilat do të financohen nga shtetet e tjera të NATO-s – veçanërisht nga Gjermania. Ky vendim erdhi si rezultat i nismës së kancelarit gjerman Friedrich Merz (CDU), edhe pse marrëveshja është parë si e brishtë.
“Kemi arritur më afër se kurrë gjatë mandatit të kësaj administrate që të vendosen masa të reja financiare apo presion i ri ndaj Putinit,” deklaroi Kristine Berzina nga instituti amerikan “German Marshall Fund” për gazetën britanike Financial Times (FT).
Megjithatë, vendet perëndimore nuk presin një ndryshim të thellë të kursit të politikës amerikane ndaj luftës, pavarësisht dërgesave të mundshme të raketave Patriot. Duke cituar burime diplomatike, FT shkruan se raketat janë të rëndësishme për mbrojtjen e trupave dhe qyteteve ukrainase, por nuk do ta ndryshojnë balancën e përgjithshme të luftës dhe as kapacitetin e Ukrainës për të ndërmarrë kundërsulme brenda territorit rus.
Gazeta ruse: Lufta s’do të përfundojë në 2025
Nga ana tjetër, në Rusi duket se tashmë po përgatiten për një përkeqësim të mëtejshëm të marrëdhënieve me SHBA-në.
▶︎ Dmitri Trenin, drejtor i një instituti për çështje ushtarake dhe strategjike në Moskë, shkruan në gazetën ruse Kommersant:
“Çfarë vjen më pas? Trump ka gjasa të nënshkruajë sanksione të reja ndaj Rusisë në formë ligji (…) Ai do t’ia dorëzojë Ukrainës edhe armatimet e fundit nga ‘pakot e Biden-it’ dhe mund të detyrohet të shtojë diçka të vetën. SHBA do të vazhdojë t’i japë Ukrainës informacione të inteligjencës, të cilat janë thelbësore për sulme – veçanërisht thellë në territorin rus.”
Parashikimi i ashpër i këtij eksperti besnik ndaj Kremlinit:
“Lufta nuk do të përfundojë në vitin 2025 (…) Kjo luftë do të jetë e gjatë, dhe SHBA – me ose pa Trump – do të mbetet armiku ynë. Bëhet fjalë jo për statusin e Ukrainës, por për mbijetesën e vetë Rusisë.”
Burimi: botasot.info
