Një ngjarje e rëndë ka tronditur opinionin publik në Meksikë, pasi një influencuese e njohur në rrjetet sociale u gjet e vdekur brenda një kamioni së bashku me bashkëshortin dhe dy fëmijët e tyre të mitur.
Trupat e pajetë të 32-vjeçares Esmeralda Ferrer Garibay, bashkëshortit të saj 36-vjeçar dhe fëmijëve të tyre, një djalë 13 vjeç dhe një vajzë 7 vjeç, u gjetën të braktisur në një mjet në qytetin Guadalajara, në shtetin e Jalisco-s.
Autoritetet hetimore kanë zbuluar se automjeti ku ndodheshin trupat e pajetë ishte lidhur me një garazh mekanik, ku u zbuluan gjurmë gjaku dhe prova balistike, duke lënë të kuptohet se vrasjet ndodhën aty.
Dy punëtorë të këtij garazhi u arrestuan dhe u morën në pyetje nga prokuroria meksikane, por u liruan për mungesë provash. Megjithatë, ndodhi diçka e pazakontë: teksa po dilnin nga zyra e prokurorit, një grup i armatosur rrëmbeu njërin prej tyre, ndërsa tjetri arriti të largohej me shpejtësi.
Nga videot me luks te këngët për kartelet
Esmeralda, e njohur në rrjet me emrin “Esmeralda FG”, kishte dhjetëra mijëra ndjekës dhe qindra mijëra pëlqime në TikTok dhe Instagram. Përmbajtja e saj fokusohej në jetën luksoze, pushime në resorte të shtrenjta dhe veshje firmato.
Në disa prej videove të saj, ajo këndonte edhe këngë të famshme në Meksikë që lavdërojnë figurat e karteleve të drogës, çka ka shtuar dyshimet mbi sfondin e jetës së saj dhe të bashkëshortit.
Objektivi
Sipas autoriteteve, pista kryesore e hetimit është se objektivi i sulmit ka qenë bashkëshorti i Esmeraldës, i cili merrej me tregti makinash dhe produkte bujqësore në shtetin e Michoacán, një zonë e njohur për praninë e grupeve kriminale.
Për momentin, vrasja mbetet e pazgjidhur, ndërsa ngjarja ka ngjallur debat të gjerë në rrjetet sociale dhe ka tronditur komunitetin online që ndiqte influencuesen.
Burimi: botasot.info
