Shërbimet e Komisariatit të Policisë Durrës, pas një pune të gjatë hetimore, finalizuan operacionin policor “Refleksi”, raporton KosovaPress.
Në kuadër të operacionit u bë kapja në flagrancë, në tentativë për të vjedhur në një automjet, dhe u vu në pranga shtetasi V. K. (37), banues në Tiranë, raporton KosovaPress.
Nga veprimet hetimore ka rezultuar se ky shtetas është autor i disa vjedhjeve me thyerje të automjeteve në lagjet numër 6, 8 dhe 12 të qytetit të Durrësit. Ky shtetas kishte vjedhur në pesë automjete në pronësi të shtetasve të ndryshëm shuma parash, laptop dhe sende të tjera personale.
Në bashkëpunim me Prokurorinë vijojnë veprimet hetimore për zbardhjen dhe dokumentimin me prova ligjore edhe të disa vjedhjeve të tjera të ndodhura më parë, që dyshohet se janë kryer nga ky shtetas.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme.
Burimi: botasot.info
