Shkup, 8 janar – Reshjet e fundit të shiut kanë vështirësuar lëvizjen në disa rrugë në Komunën e Tetovës. Më problematike dhe e bllokuar vazhdon të jetë rruga e Banjës së Tetovës. Autoritetet komunale thonë se po punojnë për hapjen e rrugës. Zëdhënësi në Komunën e Tetovës, Albion Alili, tha se pikat më kritike, siç janë fshati Poroj, Reçicë e vogël e Shipkovicë, Xherm, Sellcë, gjendja e rrugëve janë vështirë të kalueshme, por jo të bllokuara.

“Në disa vende ka pasur rrëshqitje të dheut. Më problematike ka qenë dhe është rruga e Banjës, ku është e bllokuar rruga. Autoritetet janë në terren dhe jemi duke bërë gjithçka të mundur që kjo pjesë të lirohet. Në fshatin Poroj ka pasur rrugë që të shpie për në fshatin Xherm dhe në fshatin Sellcë, por të gjitha këto janë vështirë të kalueshme, por jo të bllokuara.”, – deklaroi zëdhënësi i Komunës së Tetovës, Albion Alili.

Ndërsa gjatë ditës së sotme, lumi Vardar ka dalë nga shtrati duke vërshuar disa oborre të shtëpive në Strimnicë të Komunës së Zhelinës. Komandanti i NJTKZ – Tetovë, Avni Ameti, tha se situata është nën kontroll dhe nuk rrezikohen pronat e qytetarëve.

“Momentalisht është qetë. Nuk kemi raportime për rrezikim të qytetarëve apo shtëpive të banimit. Dihet se shtrati i lumit Vardar, që është në atë pjesë të Komunës së Zhelinës, në këtë kohë dinë të vërshojë. Por, sa kemi informacion dhe kemi qenë në vendngjarje, nuk rrezikohen jeta apo prona e qytetarëve.”, – theksoi komandanti i NJTKZ-Tetovë, Avni Ameti.

Edhe pse shumë herë janë paralajmëruar investime në ndërtimin e digave në disa shtretër të lumenjve, e përrojeve, deri më tani në Komunën e Tetovës nuk është investuar në këto pika, përjashtuar ndërtimin e shtratit të lumit në fshatin Shipkovicë.