​Tetë të vrarë nga sulmet ruse në Ukrainë, Kievi godet cisternat ruse të naftës

Të paktën tetë persona u vranë dhe dhjetëra të tjerë u plagosën nga sulmet ruse gjatë natës dhe në orët e para të së mërkurës në disa rajone të Ukrainës. Paralelisht, ushtria ukrainase njoftoi se goditi 20 anije ruse, përfshirë 17 cisterna nafte, në Detin e Zi.

Sulmet më të rënda u regjistruan në portin e Odesës, ku tre persona humbën jetën dhe tre të tjerë u plagosën pas një sulmi masiv me dronë dhe raketa.

Sipas autoriteteve lokale, një raketë goditi një ndërtesë shumëkatëshe banimi, ndërsa u dëmtuan edhe një ndërtesë jo-rezidenciale dhe një tubacion gazi. Kreu i administratës rajonale, Oleh Kiper, akuzoi Rusinë se kishte shënjestruar qëllimisht civilët.

Në qytetin verilindor të Sumy-t, tre persona u vranë dhe 17 të tjerë u plagosën si pasojë e bombardimeve me bomba ajrore të drejtuara. Dy viktima të tjera u raportuan në rajonet e Dnipropetrovskut dhe Zaporizhzhias.

Nga ana tjetër, Ministria ruse e Mbrojtjes deklaroi se objektivat e sulmeve në Odesa ishin infrastruktura portuale dhe objektet e përdorura për shkarkimin e naftës, vajrave dhe lubrifikantëve, duke pretenduar se ato shërbenin për nevoja ushtarake dhe logjistike.

Në të njëjtën kohë, ushtria ukrainase njoftoi se gjatë natës kishte goditur 20 anije ruse në Detin e Zi, përfshirë 17 cisterna nafte. Sulmet ukrainase ndaj logjistikës detare ruse kanë detyruar Moskën të kufizojë transportin detar në Detin e Azovit, një rrugë e rëndësishme për eksportet ruse të drithërave.

Sipas raportit të Misionit të Monitorimit të të Drejtave të Njeriut të Kombeve të Bashkuara në Ukrainë, gjatë muajit qershor u vranë të paktën 293 civilë dhe u plagosën 1,990 të tjerë.

Raporti thekson se raketat dhe dronët me rreze të gjatë veprimi ishin përgjegjës për 45 për qind të viktimave civile, shumica e të cilave u regjistruan larg vijës së frontit, në qytete si Kievi dhe Dnipro.