Presidenti i Shteteve të Bashkuara, Donald Trump, ka rritur pasigurinë ndërkombëtare lidhur me një ndërhyrje të mundshme ushtarake ndaj Iranit, duke dhënë sinjale kontradiktore pas dy javësh kërcënimesh dhe paralajmërimesh për veprim të ashpër në mbrojtje të protestuesve iranianë.
Trump nga Shtëpia e Bardhë nuk përjashtoi ndërhyrjen ushtarake, duke theksuar se do të “vëzhgojë zhvillimet” përpara se të marrë një vendim përfundimtar.
Deklaratat vijnë pas raportimeve se SHBA kishte nisur zhvendosjen e personelit ushtarak dhe diplomatik në Lindjen e Mesme, ndërsa stafi amerikan në Arabinë Saudite u paralajmërua të qëndronte vigjilent.
Lëvizjet rikujtuan situata të ngjashme para sulmeve ajrore amerikane ndaj objekteve bërthamore iraniane vitin e kaluar.
Tensionet u rritën veçanërisht pas raportimeve nga aktivistë iranianë se një protestues, Erfan Soltani, 26 vjeç, ishte dënuar me vdekje për pjesëmarrje në demonstrata.
Trump paralajmëroi se SHBA do të merrte “masa shumë të forta” nëse ekzekutimet do të realizoheshin, duke theksuar se qëllimi i tij për Iranin ishte “fitorja”.
Në Uashington dhe mes aleatëve amerikanë në Gjirin Persik ka shqetësime për pasojat e një ndërhyrjeje të drejtpërdrejtë. Demokratët në Kongres dhe zyrtarë rajonalë paralajmërojnë se veprimi ushtarak mund të forcojë regjimin iranian, të dëmtojë civilët dhe të shkaktojë destabilitet të gjerë rajonal.
Analistët theksojnë se Irani ka treguar më parë aftësi për hakmarrje ushtarake, përfshirë sulme ndaj objekteve saudite dhe bazave amerikane në rajon, duke e bërë çdo përshkallëzim potencialisht të rrezikshëm.
Pavarësisht këtyre zhvillimeve, mbetet e paqartë nëse administrata Trump do të ndërmarrë realisht veprime ushtarake ndaj Iranit apo do të vazhdojë strategjinë e pasigurisë dhe presionit diplomatik.
Top Channel
Burimi: top channel
