Shefi i OKB-së për të Drejtat e Njeriut, Volker Turk, ka dënuar sulmet ajrore të ushtrisë së Myanmarit në shtetin Rakhine, ku sipas raportimeve kanë humbur jetën të paktën 50 persona.

Sulmet goditën të hënën një treg të mbipopulluar në qytezën Kyauktaw, duke vrarë shitës, klientë, punëtorë transporti dhe civilë të tjerë, përfshirë gra dhe fëmijë.

Të paktën 58 persona të tjerë janë raportuar të plagosur. Zyra e OKB-së për të Drejtat e Njeriut e përshkroi ngjarjen si një nga sulmet më vdekjeprurëse në Rakhine që nga grushti ushtarak i vitit 2021.

Türk tha se sulmi ngre shqetësime serioze për respektimin e së drejtës ndërkombëtare humanitare dhe u bëri thirrje palëve të respektojnë parimet e dallimit, proporcionalitetit dhe masave paraprake gjatë sulmeve.

Ai kërkoi gjithashtu ndalimin e kthimit me forcë të shtetasve të Myanmarit, duke theksuar se kushtet në vend mbeten të pasigurta për shkak të shkeljeve të rënda të të drejtave të njeriut.

Burimi: botasot.info