Të paktën 27 të vdekur pas përmbytjes së një anijeje turistike në Vietnam

Të paktën 27 persona vdiqën pasi një varkë turistike u përmbys për shkak të motit të keq  në Gjirin Halong të Vietnamit të shtunën, raportuan mediat shtetërore.

Varka, që mbante 53 persona, u përmbys rreth orës 14:00 sipas orës lokale, ndërsa stuhia Wipha i afrohej vendit përtej Detit të Kinës Jugore. Në zonë u raportuan erëra të forta, reshje të dendura shiu dhe vetëtima.

Shumica e turistëve ishin nga kryeqyteti, Hanoi, raportoi gazeta lokale VnExpress. Nuk kishte asnjë njoftim zyrtar mbi kombësinë e turistëve, ndërsa ekipet e emergjencës vazhduan të kërkonin për të mbijetuarit.

Ekipet e shpëtimit gjetën 11 të mbijetuar dhe nxorën 27 trupa, tetë prej të cilëve fëmijë, tha Agjencia Shtetërore e Lajmeve të Vietnamit, duke cituar autoritetet lokale.

Gjiri Halong, rreth 200 kilometra në verilindje të Hanoit, tërheq dhjetëra mijëra vizitorë çdo vit. Turët me varkë janë jashtëzakonisht të popullarizuara, shkruan Reuters.