Zyrtarët evropianë e kanë kritikuar ashpër kryeministrin belg, pasi ai bëri thirrje për një marrëveshje me Rusinë për t’i dhënë fund luftës në Ukrainë, në mënyrë që Evropa të rifitojë aksesin në energjinë e lirë ruse.
Bart de Wever i tha gazetës belge l’Echo, në një intervistë të botuar të shtunën, se Evropa “duhet të normalizojë marrëdhëniet e saj me Rusinë dhe të rifitojë aksesin në energji të lirë. Është logjike”, duke shtuar se “pas dyerve të mbyllura” udhëheqësit evropianë po i thonë se ka të drejtë.
Deklaratat e tij u kritikuan nga ministrat e BE-së që u takuan sot në Bruksel.
“Rusia po masakron jetë të pafajshme në Ukrainë çdo javë. Ne nuk do të blejmë gaz nga Rusia. Ne nuk do ta ushqejmë makinën ruse të luftës”, tha Ministrja Suedeze e Energjisë, Emba Busch.
“Nëse në këtë kohë nevoje dhe krize e tërheqim vendimin për t’u larguar nga varësia ruse, atëherë e kemi humbur plotësisht busullën tonë morale.”
“Për një kohë shumë të gjatë kemi qenë të varur nga energjia ruse, duke i lejuar Putinit të na shantazhojë me energji”, tha të hënën në Bruksel komisioneri i energjisë i BE-së, Dan Jorgensen.
“Ne jemi të vendosur të qëndrojmë në kursin e duhur për këto çështje.”
Deklaratat e Bart de Wever shkaktuan reagime edhe brenda vendit të tij. Zëvendëskryeministri dhe Ministri i Jashtëm Maxime Prévost , i cili vjen nga partia centriste frëngjishtfolëse Les Engagés, tha se ndërsa Evropa duhet të ndjekë dialogun diplomatik me Rusinë, “dialogu nuk është i njëjtë me normalizimin. Dhe ky është një dallim thelbësor. Sot, Rusia refuzon një prani evropiane në tryezën e negociatave dhe ruan kërkesat maksimaliste”.
Ai shtoi se për sa kohë që situata mbetet e tille, “të flasësh për normalizim dërgon një mesazh dobësie dhe minon unitetin evropian që na duhet tani më shumë se kurrë”.
Ndërhyrja e De Wever, i cili kryeson partinë nacionaliste NVA, është një vazhdim i qëndrimit të tij vitin e kaluar kur shprehu kundërshtimin e tij ndaj një plani për të përdorur asetet e ngrira ruse për të ndihmuar Ukrainën.
Burimi: botasot.info
