Të akuzuar për korrupsion zgjedhor, SPAK çon për gjykim dy persona nga Kukësi

SPAK ka çuar për gjykim dosjen në ngarkim të dy personave nga Kukësi, të akuzuar për korrupsion zgjedhor.

Bëhet fjalë për Kalosh Peposhin, i akuzuar për kryerjen e veprës penale “Korrupsioni aktiv në zgjedhje”, kryer në bashkëpunim, i hetuar me masë sigurimi “arrest në burg”, dhe Gazmend Peposhin, i akuzuar për të njëjtën vepër, në bashkëpunim, i hetuar me masë sigurimi “arrest në burg” në mungesë.

Procedimi penal është regjistruar mbi bazën e materialit referues të Drejtorisë Vendore të Policisë Kukës.

“Nga hetimet proaktive dhe ndjekja me metoda speciale, përfshirë përgjime dhe vëzhgime, kanë evidentuar se të pandehurit kanë premtuar dhe dhënë shuma monetare zgjedhësve në Njësinë Administrative Ujmisht, në këmbim të votës për një subjekt politik, gjatë fushatës zgjedhore për zgjedhjet parlamentare të 11 majit 2025” thuhet në njoftimin e SPAK.

Spak thotë se nga hetimet eshte evidentuar se të pandehurit kanë qenë aktivë në fushatën zgjedhore në mbështetje të këtij subjekti politik, duke ofruar dhe shpërndarë mjete monetare ndaj zgjedhësve për të ndikuar në mënyrën e votimit të tyre.