Presidenti i Shteteve të Bashkuara të Amerikës Donald Trump mund të zgjasë afatet e tij të tarifave reciproke, njoftoi sot Shtëpia e Bardhë, raporton KosovaPress.
E pyetur nëse presidenti është ende i përkushtuar për të arritur marrëveshje tregtare brenda afatit, zëdhënësja Karoline Leavitt tha se data “nuk është kritike”.
“Presidenti thjesht mund t’u ofrojë këtyre vendeve një marrëveshje nëse ato refuzojnë ta bëjnë brenda afatit. Dhe kjo do të thotë që presidenti mund të zgjedhë një normë reciproke tarifore që ai beson se është e dobishme për Shtetet e Bashkuara dhe punëtorin amerikan,” tha ajo.
Sa i përket marrëveshjeve të mundshme tregtare, Leavitt theksoi se Përfaqësuesi i Tregtisë Jamieson Greer ka pasur diskutime produktive me shumë nga partnerët kryesorë tregtarë të Shteteve të Bashkuara të Amerikës.
“Ndoshta (afati) mund të zgjatet, por ky është një vendim që duhet ta marrë presidenti”, shtoi Leavitt.
Trump kërcënoi muajin e kaluar se do të vendoste një tarifë të drejtpërdrejtë prej pesëdhjetë për qind ndaj Bashkimit Evropian, duke filluar nga një qershori, sepse bisedimet tregtare “nuk po çonin askund”. Por, pasi diskutoi me presidenten e Komisionit Evropian, Ursula von Der Leyen, Trump e zgjati afatin deri më nëntë korrik.
Trump përballet gjithashtu me fundin e një pezullimi tremujor për vendosjen e tarifave reciproke ndaj pothuajse çdo kombi tjetër. Pushimi që i uli tarifat pothuajse universale në një masë prej dhjetë për qind do të përfundojë më tetë korrik.
Burimi: botasot.info
