Sveçla pret në takim përshëndetës komandantin e KFOR-it, Enrico Barduani

Në një takim përshëndetës me Komandantin e KFOR-it në Kosovë, Gjeneralmajor Enrico Barduani, me rastin e përfundimit të mandatit të tij, ministri në detyrë i Mbrojtjes, Xhelal Sveçla ka shprehur falënderimet e tij për mbështetjen dhe bashkëpunimin e ngushtë që Barduani ka pasur me institucionet e sigurisë në Kosovë.

Sveçla ka theksuar se Kosova dhe Italia, vendi prej nga vjen Barduani, ndajnë vlera të përbashkëta si paqja, stabiliteti dhe siguria për vendin dhe qytetarët e Kosovës.

Ai ka nënvizuar gjithashtu përkushtimin e Kosovës në rrugën e pandalshme drejt integrimit në Bashkimin Evropian dhe NATO.

“Shpreh mirënjohjen time për kontributin e çmuar të Komandant Barduani gjatë mandatit të tij dhe i uroj suksese në përgjegjësitë e ardhshme, duke qenë i bindur se ura e bashkëpunimit ndërmjet institucioneve tona dhe KFOR-it do të mbetet e fortë dhe e qëndrueshme”, ka shkruar ai në Facebook.