Dhjetë vite pas hapjes, restoranti Sugalabo mbetet një prej përvojave më të paarritshme kulinare në Japoni. Përkundër famës ndërkombëtare të shefit Yosuke Suga, nxënës i mjeshtrit legjendar Joël Robuchon, dera e këtij lokali nuk hapet për këdo.
Rregulli i “të ftuarve”
Sugalabo funksionon sipas një varianti modern të traditës japoneze Ichigensan okotowari – “pa hyrje për klientët e rinj pa rekomandim”. Nuk ka sistem rezervimi online, nuk ka orare të shpallura zyrtarisht dhe numri i telefonit është privat, i njohur vetëm nga ata që tashmë kanë provuar përvojën.
Në praktikë, kjo do të thotë se një klient i ri mund të futet vetëm nëse ftohet nga një mysafir i rregullt dhe as kjo nuk garanton rikthim. Restoranti, me vetëm 20 vende të uljes, ushqen një listë të kufizuar miqsh që kthehen vazhdimisht.
“Shefi Suga këmbëngul se kjo nuk është snobizëm, por kujdes për përvojën e mysafirëve. ‘Jemi shumë të qëllimshëm në mirëseardhjen e njerëzve që e kuptojnë atë që bëjmë dhe shijet e të cilëve i njohim. Vetëm kështu mund t’u përgjigjemi pritshmërive në mënyrë të personalizuar,’ shpjegon ai.”
Përtej shijes marrëdhënie personale
Për Suga-n, ushqimi është vetëm gjysma e historisë. Po aq e rëndësishme është lidhja njerëzore me klientin.
“Përpiqemi të kuptojmë sfondin e tyre nëse janë mjekë, avokatë, njerëz finance apo gazetarë sepse kjo ndikon në llojin e bisedës që zhvilloj me ta,” thotë ai.
Qëllimi është i qartë: të ndërtohet një marrëdhënie e ndërsjellë besimi. “Nëse njerëzit nuk kthehen më, restoranti vdes. Por kur krijon një lidhje të fortë, ajo bëhet e qëndrueshme.”
Një omakase që sfidon kulturën perëndimore
Sugalabo ofron vetëm një menu omakase – ku zgjedhja i lihet plotësisht shefit. Për mysafirët, kjo përmbys logjikën e zakonshme perëndimore ku klienti është në qendër dhe kuzhina përshtatet ndaj tij.
Këtu, është shefi që udhëheq rrugëtimin, duke përdorur produktet më të mira sezonale të Japonisë dhe duke i dhënë secilit pjatë një pjesë të vetes.
Burimi: botasot.info
