Muzeu i Luvrit në Paris u rihap plotësisht këtë të premte, pasi punonjësit votuan për të pezulluar grevën që kishte ndërprerë aksesin në muzeun më të vizituar në botë.
Sipas Associated Press, vendimi u mor gjatë një asambleje të përgjithshme të stafit, ku punonjësit votuan unanimisht për ndalimin e përkohshëm të grevës, me qëllim rikthimin e muzeut në funksion normal dhe pritjen e vizitorëve.
Greva kishte çuar në mbylljen e plotë të Luvrit në fillim të javës dhe në një rihapje të pjesshme të mërkurën.
Sindikatat thanë se pezullimi i grevës erdhi pas pesë takimeve me përfaqësues të Ministrisë së Kulturës, por theksuan se përparimi mbetet i pamjaftueshëm, veçanërisht në lidhje me mungesën e stafit, nivelin e pagave dhe planet afatgjata të sigurisë.
Po ashtu, ato ngritën shqetësime për degradimin e ndërtesës dhe kushtet e punës.
Përfaqësuesit sindikalë kritikuan drejtuesen e Luvrit, Laurence des Cars, duke e akuzuar për mungesë angazhimi gjatë grevës, pasi, sipas tyre, ajo nuk u takua me stafin dhe nuk iu drejtua punonjësve gjatë protestës.
Punonjësit pritet të mbajnë një tjetër asamble të përgjithshme më 5 janar, ku do të vendosin nëse do të rifillojnë apo jo grevat.
Top Channel
Burimi: top channel
