Profesori universitar, Nexhmedin Spahiu, ka paralajmëruar se Kosova nuk duhet ta neglizhojë rrezikun e një konflikti të armatosur me Serbinë, pasi ky rrezik është permanent përderisa Beogradi nuk e njeh shtetësinë e saj.
Kështu tha Spahiu pas deklaratave të presidentit serb, Aleksandar Vuçiq, i cili nga Samiti i Komunitetit Politik Evropian në Kopenhagë tha se “të gjithë po përgatiten për luftë” dhe se Kosova po përpiqet ta shfrytëzojë këtë kohë “para luftës” për të fituar mbështetjen e vendeve të NATO-s dhe shumicës së shteteve evropiane.
Vuçiq deklaroi se “bota do të bëhet gjithnjë e më e vështirë” dhe se sipas tij, “po shkojmë drejt një konflikti të madh”.
“Derisa ti ke një shtet fqinj që nuk të njeh, rreziku i luftës është permanent, prandaj të gjithë aleatët tanë, të gjithë miqtë e Kosovës janë të angazhuar që të ketë dialog mes Kosovës e Serbisë që të mos ketë luftë sërish. Vetëm ne e neglizhojmë, mendojmë që KFOR-i është aty dhe atij s’ia le pushka – edhe ushtarit të KFOR-it ia le pushka edhe ushtarit të NATO-s ia le pushka edhe rreziku i luftës është permanent”, tha Spahiu në emisionin “Info Nata”.
Ai shtoi se shmangia e luftës nuk nënkupton dorëzim, por gatishmëri për t’u mbrojtur.
“Duhet me punua dhe me veprua në mënyrë të tillë që me shmang luftën. Shmangia nuk nënkupton duke u dorëzuar, por duke treguar që ti je i gatshëm edhe ai që ta mësyn mos me qenë i sigurt që ka me fitu, por që mund të humbë. Kjo nuk është asgjë e re, thjeshtë një retorikë e vjetërsuar dhe ne mund të presim që çdo moment mundet me pas një sulm”.
Sipas tij, tani rreziku është edhe më i madh, pasi strukturat paralele serbe janë larguar nga veriu i Kosovës dhe Serbia mund të synojë agresion ushtarak për të ndalur ndërkombëtarizimin e mëtejshëm të Kosovës.
Burimi: botasot.info
