Të enjten në fshatin Golluboc të Malishevës u raportua një vrasje e dyfishtë, ku viktima mbetën dy vëllezër, Naim dhe Driton Morina. Ata u qëlluan për vdekje me armë zjarri nga dhëndri i tyre, i dyshuari Astrit Isufi, tashmë i arrestuar nga autoritetet policore.
Ngjarje të tilla tragjike po bëhen gjithnjë e më të shpeshta në Kosovë. Sipas sociologes Bukurije Rrustemi, rastet e vrasjeve janë kthyer në fenomen shqetësues shoqëror.
“Shumica e vrasjeve ndodhin për motive të ulëta. Një pjesë e madhe e autorëve janë recidivistë, pra persona që kanë kryer më parë vepra penale. Faktorë të tjerë ndikues janë edhe problemet ekonomike, sociale, si dhe numri i madh i armëve ilegale që ndodhen ende në duart e qytetarëve,” ka thënë Rrustemi.
Edhe sociologë të tjerë theksojnë se institucionet përgjegjëse duhet të ndërmarrin masa parandaluese më efektive për raste të tilla.
“Kemi problem serioz me mungesën e mekanizmave parandaluese. Duhet të përmirësohen mekanizmat e drejtësisë, duke filluar nga legjislacioni, qendrat korrektuese, si dhe programet e rehabilitimit e risocializimit të recidivistëve që lirohen në shoqëri. Për më tepër, dhuna po shndërrohet në normë dhe vlerë, duke u përdorur si mënyrë për zgjidhjen e konflikteve,” ka thënë sociologu Genc Xërxa.
Sipas Policisë së Kosovës, vetëm gjatë periudhës janar-gusht në Kosovë kanë ndodhur 12 vrasje.
Ndërkaq, në baza vjetore Policia e Kosovës thekson se konfiskon deri në 1,500 armë ilegale të llojeve të ndryshme.
Burimi: botasot.info
