Brad Pitt duket se po fillon një kapitull të ri në jetën e tij me stilisten e bizhuterive, Ines de Ramon, me të cilën ka një lidhje serioze prej vitit 2022.
Aktori 61-vjeçar, i cili vazhdon të jetë në një betejë ligjore me ish-gruan Angelina Jolie për pronësinë e vreshtit të tyre në Francë, është shfaqur shpesh në publik pranë Ines, duke përfshirë dhe evente të rëndësishme si promovimi i filmit të tij të fundit “F1”.
Sipas një burimi të afërt me çiftin, ata po jetojnë së bashku në rezidencën luksoze të Pitt në Los Angeles, por nuk ka plane për martesë në të ardhmen e afërt – madje as ndonjëherë, shkruan DailyMail.
“Ai tha se nuk do të martohet më, por kurrë mos thuaj kurrë. Megjithatë, do të habitesha nëse do të ndodhë”, shpjegon burimi, duke shtuar se marrëdhënia e tyre është serioze dhe e qëndrueshme.
Burimi thekson se aktori është në një gjendje shumë më të mirë emocionalisht dhe ka përqafuar jetën e re me Inesin, e cila është shumë e qetë dhe mbështetëse.
Që nga ndarja shumë publike me Jolie, Brad ka ndaluar pirjen e alkoolit dhe ka marrë pjesë në takime të Alkoolistëve Anonimë, duke përmirësuar dukshëm stilin e tij të jetesës.
Megjithatë, marrëdhënia me fëmijët nga martesa me Angelina mbetet e vështirë. Tre prej tyre – Zahara (20 vjeçe), Shiloh (19) dhe Vivienne (16) – kanë hequr mbiemrin e tij, dhe ai nuk i ka parë shpesh, pavarësisht se ende i do shumë. “Është e trishtë, por ka shumë dhimbje që një person mund të përballojë”, tha burimi.
Gjatë divorcit të tyre të komplikuar, Angelina e akuzoi Brad për abuzim gjatë një fluturimi, por aktori i mohoi këto pretendime dhe hetimet e FBI-së nuk gjetën prova për akuza kriminale.
Burime të tjera theksojnë se edhe pse Brad ka pasur sjellje të papërshtatshme në atë incident, nuk ka kryer asgjë të jashtëligjshme. “Angelina nuk e priste që ai do t’i kundërvihej pas atij incidenti”, tha një burim, duke shtuar se ekipi i Pitt vazhdon t’i qëndrojë pranë.
Në fillim të dekadës së tij të shtatë, Brad është ende shumë i pashëm dhe ka investuar në pamjen e tij, duke punësuar stilistë për turneun promovues të filmit të tij të fundit.
Burimi: botasot.info
