Banorët e Soto de Viñuelas, një periferi të Madridit, u përballën me pamje të tmerrshme kur u rikthyen në shtëpitë e tyre pas një zjarri që përfshiu mbi 1,000 hektarë tokë, dogji shtëpi dhe mori jetën e një personi që po përpiqej të shpëtonte kuajt nga një stallë lokale.
Adolfo López, një studiues farmaceutik që jeton në Francë, ishte në vizitë te prindërit e tij kur pa tymin që afrohej në mbrëmjen e së hënës, rreth orës 19:45. Fillimisht ishte thjesht tym, por shumë shpejt ai u kthye në flakë, duke i detyruar ata të evakuoheshin në një hotel afër.
Kur u kthyen të martën, shtëpia e prindërve të tij ishte djegur plotësisht. “Të paktën është vetëm shtëpia,” tha ai. “Të gjithë janë mirë, prindërit janë mirë. Shtëpia mund të rindërtohet…”
Disa fqinjë kishin pasur më shumë fat, flakët ishin ndalur në kufijtë e pronave të tyre, duke djegur vetëm bimësinë përreth. Megjithatë, frika mbetet se nxehtësia dhe erërat e forta mund të rikthejnë zjarret.
Në mesin e tragjedisë, komuniteti u trondit edhe nga vdekja e një burri 55-vjeçar me origjinë rumune, i cili vdiq duke u përpjekur të shpëtonte kuajt në stallë. Ai pësoi djegie në 98% të trupit dhe ndërroi jetë pas transportimit me helikopter në spital. Brenda në stallë ngordhën 26 kuaj.
Rreth 180 persona u evakuuan gjatë natës, duke kaluar orët në një qendër komunitare. Kryetari i bashkisë së Tres Cantos, Jesús Moreno García, u shpreh se zjarrfikësit nuk kishin parë kurrë një zjarr kaq të shpejtë dhe të dhunshëm. “Gjithçka ndodhi me shpejtësi për shkak të erërave të forta,” tha ai për një televizion lokal. “Kemi përjetuar diçka vërtet tronditëse.”
Në rrugët mes kodrave të zeza nga tymi, automjetet e njësive ushtarake të emergjencës dhe zjarrfikësve vazhdonin të patrullonin, ndërsa banorët vlerësonin dëmet.
Burimi: botasot.info
