Drejtori i Drejtorisë Vendorore të Policisë Vlorë, Elidon Çela doli në një konferencë shtypi ku foli për arrestimin e shtetasit Flodian Plaku i akuzuar për vrasjen e Gentjan Bejtjas.
Policia e Vlorës publikoi edhe videon e operacionit për arrestimin e Plakut.
Konferencë për shtyp e Drejtorit të Drejtorisë Vendore të Policisë Vlorë Drejtues Elidon Çela, mbi rezultatet e operacionit policor “ETERNA”, si dhe për rezultatet e punës hetimore dhe policore të ditëve të fundit, për zbardhjen e ngjarjeve kriminale të kryera më parë, në qarkun Vlorë
Deklarata:
Ja pamjet e operacionit policor të koduar “ETERNA”, të finalizuar me sukses nga strukturat e Drejtorisë Vendore të Policisë Vlorë, në bashkëpunim me Drejtorinë e Forcës së Posaçme Operacionale në Departamentin e Policisë Kriminale, në Drejtorinë e Përgjithshme të Policisë së Shtetit.
Gjatë operacionit u kap shtetasi me rrezikshmëri të lartë shoqërore, i shpallur në kërkim për vrasje me paramendim, Flodian Plaku, i cili në momentin e ndalimit ishte i armatosur me armë zjarri, me fishek në fole, gati për qitje.
Po gjatë operacionit, u arrestuan edhe 4 shtetas të tjerë që e ndihmonin dhe e strehonin.
Në cilësinë e provës materiale u sekuestruan:
– 2 armë zjarri pistoletë,
– municion luftarak,
– 25 000 euro cash,
– 7 celularë.
Pamjet e operacionit tregojnë profesionalizmin dhe përkushtimin e strukturave të Policisë së Shtetit për goditjen e krimeve të rënda dhe garantimin e sigurisë publike.
Burimi: botasot.info
