Shenja të qarta që tregojnë se lidhja ka mbaruar

Kur një marrëdhënie fillon të shkërmoqet, është e natyrshme të pyesësh veten nëse mund të shpëtohet apo nëse është koha për t’i dhënë fund.

Ndërsa dashuria nuk është i vetmi përbërës i nevojshëm që një marrëdhënie t’i rezistojë kohës, ajo është ende thelbësore dhe heqja dorë nga dikush që e do vërtet mund të të lërë me zemër të thyer për vite me radhë.

Nëse e njihni veten në situatat e mëposhtme, mund të jetë koha të pranoni që marrëdhënia juaj nuk ka të ardhme, shkruan YourTango.

Nuk ka më besim

Besimi është themeli i çdo marrëdhënieje. Pasi të thyhet, veçanërisht nëse ka ndodhur vazhdimisht, është pothuajse e pamundur ta rifitosh. Nëse njëri partner ka qenë jobesnik, tjetri ka të ngjarë të bëhet dyshues për çdo rikthim pasues.

Ata do të kontrollojnë rrobat tuaja, do të kërkojnë gjurmë parfumi ose buzëkuqi dhe madje mund të përpiqen të hakojnë telefonin tuaj. Kur humbet besimi, hapet rruga drejt sjelljes toksike dhe është më mirë të kërkoni një fillim të ri me dikë tjetër.

Nuk e shihni të ardhmen bashkë

Kur mendon për jetën tënde pas pesë ose dhjetë vitesh, nuk e sheh partnerin tënd në krah. Nëse nuk mund ta imagjinosh një të ardhme me personin me të cilin je në një lidhje, ndoshta nuk do ta kesh një të tillë. Marrëdhëniet afatgjata ndërtohen mbi planifikimin e përbashkët dhe përfshirjen e partnerit në vendimet e jetës, dhe nëse kjo nuk është e mundur, marrëdhënia është drejt fundit.

Ju keni qëllime krejtësisht të ndryshme në jetë

Njëri prej jush dëshiron fëmijë dhe një jetë të qetë në periferi, ndërsa tjetri nuk dëshiron fëmijë dhe e do zhurmën e qytetit të madh. Njëri është i gatshëm të zhvendoset për punë, ndërsa tjetri ka investuar vite në karrierën e tij në kompaninë për të cilën punon aktualisht. Kur nuk mund të bini dakord për vendime kyçe në jetë, si krijimi i një familjeje, ku të jetoni dhe mbështetja e njëri-tjetrit në karrierën tuaj, marrëdhënia është e dënuar të dështojë.

Prania e partnerit tuaj ju lodh

Njerëzit që duhet të jenë në jetën tënde për një kohë të gjatë janë ata që të mbushin me energji dhe të inkurajojnë të jesh versioni më i mirë i vetes. Nëse partneri yt të shterron emocionalisht, duke të lënë të pamotivuar dhe të rraskapitur, ai nuk po i shton diçka jetës tënde, por po i heq asaj. Ky është një shenjë e qartë se kufijtë, komunikimi dhe ekuilibri janë thyer.

Intimiteti është zhdukur

Prekja fizike, nga përkëdheljet e buta në shpinë deri te përqafimet dhe mbajtja e duarve, është çelësi për të mbajtur një marrëdhënie të shëndetshme. Nëse keni pushuar së qeni intim në dhomën e gjumit ose nuk jeni më të interesuar për të, është një shenjë e madhe se pasioni dhe afërsia që dikur ju lidhte është zhdukur. Një marrëdhënie pa romancë dhe intimitet nuk është e qëndrueshme në planin afatgjatë.

Ju debatoni vazhdimisht

Grindjet dhe sherret e vazhdueshme janë tregues të kritikës, mbrojtjes dhe përbuzjes: tre “vrasësit” më shkatërrues të çdo marrëdhënieje. Është veçanërisht shqetësuese nëse grindeni vazhdimisht për të njëjtat gjëra, shpesh të parëndësishme. Kjo zakonisht është një simptomë e një problemi më të thellë që është i vështirë, nëse jo i pamundur, për t’u zgjidhur.

Ke hequr dorë aq shumë saqë as nuk debaton më

Nëse keni arritur në një pikë ku nuk ju intereson aq sa të debatoni, e lëre më të luftoni për marrëdhënien tuaj, zyrtarisht gjithçka ka mbaruar. Ndoshta thjesht po prisni që të kalojë, duke u përpjekur në mënyrë pasive-agresive të gjeni një rrugëdalje, ose duke e sabotuar në mënyrë të pavetëdijshme marrëdhënien. Ndoshta tashmë mendoni se marrëdhënia ka mbaruar, por nuk guxoni të bëni hapin përfundimtar. Por është koha.