Një marrëveshje për t’i dhënë fund luftës në Ukrainë mund të jetë më afër se kurrë, sipas të dërguarit amerikan Keith Kellogg, i cili deklaroi se procesi i paqes ndodhet “në metrat e fundit”. Por Kremlini ka bërë të qartë se disa nga propozimet e Uashingtonit kërkojnë “ndryshime radikale”, duke sinjalizuar se bisedimet mbeten ende të brishta.
Kellogg, i cili pritet të largohet nga detyra në janar, tha se vetëm dy çështje madhore po e pengojnë finalizimin e marrëveshjes: e ardhmja territoriale e Donbasit dhe statusi i centralit bërthamor të Zaporizhzhias, më i madhi në Europë, aktualisht nën kontrollin rus. “Nëse këto dy pika zgjidhen, pjesa tjetër do të ecë normalisht. Jemi vërtet shumë afër,” u shpreh ai, sipas Reuters.
Deklaratat vijnë pas takimit katërorësh të presidentit rus Vladimir Putin me të dërguarin special të Donald Trump, Steve Witkoff, dhe dhëndrin e Trump, Jared Kushner, të cilët janë angazhuar në hartimin e një kornize të mundshme marrëveshjeje. Kremlini konfirmoi se bisedimet janë fokusuar tek “çështjet territoriale”, një term që aludon për pretendimet ruse mbi të gjithë Donbasin.
Presidenti ukrainas Volodymyr Zelensky ka paralajmëruar se dorëzimi i pjesëve të mbetura të Donetskut do të ishte i paligjshëm pa referendum dhe do të rrezikonte sigurinë e Ukrainës në të ardhmen.
Ndërkohë, Moska ka sinjalizuar pakënaqësi ndaj disa prej propozimeve të SHBA-ve. Këshilltari i Putinit, Yuri Ushakov, deklaroi se dokumentet amerikane “kërkojnë ndryshime serioze, madje radikale”, pa dhënë detaje se çfarë kërkon konkretisht Rusia.
Në sfondin e këtyre negociatave, Kellogg theksoi koston katastrofike të luftës: mbi 2 milionë të vrarë dhe të plagosur nga të dyja palët që prej vitit 2022, një shifër që as Moska dhe as Kievi nuk e pranojnë publikisht.
Aktualisht Rusia kontrollon rreth 19.2% të territorit të Ukrainës, përfshirë Krimenë, gjithë Luhanskun, më shumë se 80% të Donetskut dhe pjesë të Khersonit e Zaporizhzhias.
Muajin e kaluar u publikuan në media një grup prej 28 propozimesh paqeje të hartuar nga SHBA-të, që kanë shqetësuar zyrtarët ukrainas dhe europianë, pasi shihen si tepër të favorshme për Moskën, përfshirë kufizime për NATO-n dhe kontroll rus mbi një të pestën e Ukrainës.
Megjithatë, për herë të parë prej muajsh, të dyja palët pranojnë se bisedimet kanë hyrë në fazën më vendimtare, edhe pse mbetet e paqartë nëse kompromisi përfundimtar do të jetë i pranueshëm për të gjithë aktorët.
Burimi: botasot.info
