Sekreti i flokëve të mëndafshtë të japonezeve – dy shampo, një vaj dhe një sekret para larjes

Nëse dëshironi të dini ku qëndron sekreti i flokëve të mëndafshtë të japonezeve, së pari duhet të dini se për to kjo është më shumë se një rutinë bukurie

Në Japoni, kujdesi për flokët është më shumë sesa një pjesë e rutinës së bukurisë. Është një ritual i përshkuar nga respekti për trupin, vëmendja ndaj detajeve dhe ndjenja e harmonisë së brendshme. Kur një japoneze i kreh flokët, ajo e bën këtë ngadalë, sikur po u flet atyre. Në çdo lëvizje ka mirënjohje dhe kujdes. Kështu krijohet një marrëdhënie e veçantë, ku bukuria nuk është qëllim, por pasojë natyrale e përkujdesjes.

Flokët si pasqyrim i shpirtit

Në kulturën japoneze, flokët janë konsideruar gjithmonë më shumë sesa një zbukurim i thjeshtë. Ato janë vazhdim i shpirtit, simbol i vitalitetit dhe pastërtisë. Që në periudhën Heian (794–1192), flokët e gjatë e të zinj ishin simboli suprem i feminitetit. Gratë fisnike i linin flokët të rriteshin deri në dysheme dhe kujdesi për to zgjaste me orë të tëra: krehje me krehra druri, aplikim vajrash dhe tharje në puhizën e mëngjesit.

Tekstet e lashta thonë: “Bukuria e gruas fillon me shkëlqimin e flokëve të saj.” Flokët simbolizonin qetësinë, butësinë dhe ekuilibrin e brendshëm. Shumë gjëra kanë ndryshuar, janë shfaqur produkte moderne, sallone dhe pajisje, por filozofia ka mbetur e njëjtë: kujdes dhe vetëdije.

Filozofia e kujdesit japonez

Rregulli kryesor i sistemit japonez të bukurisë është përqendrimi te shkaqet, jo te pasojat. Nëse flokët humbin shkëlqimin, japonezet nuk nxitojnë të blejnë një maskë me “efekt të menjëhershëm”. Ato nisin nga gjëja më e rëndësishme – lëkura e kokës. Në Japoni thuhet: “Lëkura e kokës është toka, flokët janë kopshti. Nëse do lule të bukura, kujdesu për tokën.”

Prandaj kujdesi japonez për flokët bazohet në kujdesin ndaj lëkurës së kokës. Shampot zgjidhen jo vetëm sipas tipit të flokut, por edhe sipas gjendjes së lëkurës së kokës: a ka nevojë për pastrim të butë, hidratim, freskim në verë apo ushqim në dimër. Produktet janë të buta, pa surfaktantë agresivë dhe shpesh përmbajnë ekstrakte bimore dhe aminoacide.

Japonezet përdorin dy shampo: një për pastrim dhe një për rigjenerim. Pas kësaj, gjithmonë masazhojnë lëkurën e kokës. Ky gjest jo vetëm që stimulon rritjen e flokëve, por ndihmon edhe në relaksim, uljen e tensionit dhe përmirësimin e qarkullimit të gjakut. Flokët e bukur janë të lidhur ngushtë me gjendjen mendore, transmeton Telagrafi.

Traditat historike

Në të kaluarën, për kujdes përdoreshin vajra natyralë, më së shpeshti vaji i kamelies. Ai u jepte flokëve volum, elasticitet dhe atë “shkëlqim japonez” karakteristik. Gratë e aplikonin në gjatësinë e flokëve, i krehin me kujdes me krehra prej shkoze dhe më pas i gërshetonin flokët për ta shpërndarë vajin në mënyrë të njëtrajtshme. Këta krehra trashëgoheshin brez pas brezi. Çdo grua kishte të vetin: të ngrohtë në prekje, të lëmuar nga koha, me aromë druri dhe një pikë të vajit të preferuar.

Rituali i krehjes së flokëve konsiderohej meditativ. Gruaja ulej para pasqyrës, kalonte krehërin nëpër flokë dhe me çdo lëvizje çlirohej nga ankthi, hidhërimi dhe lodhja. Kështu, flokët bëheshin jo vetëm pjesë e pamjes së saj, por edhe ruajtës të paqes së brendshme.

Ritualet moderne: hap pas hapi

Sot, kujdesi japonez ka ruajtur të njëjtën ide, por është bërë më i avancuar teknologjikisht.

Ja si duket një rutinë tipike e kujdesit për një japoneze moderne:

1.Masazh i lëkurës së kokës para larjes. Disa minuta lëvizje të buta me gishta ose me furçë speciale nxisin qarkullimin dhe ndihmojnë në largimin e papastërtive.

2.Pastrimi i dyfishtë. Shampo e parë shpërndan butësisht sebumin dhe mbetjet e produkteve të stilimit. E dyta është shampo rigjeneruese me keratinë, aminoacide dhe ekstrakte bimore.

3.Maskë ose balsam. Në Japoni, balsami nuk është formalitet, por pjesë e domosdoshme e ritualit. Lihet në flokë të paktën 3-5 minuta që përbërësit aktivë të depërtojnë në strukturën e flokut.

4.Shpëlarje me ujë të ftohtë. Ndihmon në mbylljen e kutikulës dhe i bën flokët më të lëmuar. Për japonezet, ky është një hap rutinë, si larja e fytyrës në mëngjes.

5.Vaj në maja. Zakonisht disa pika vaj tsubaki ose argani për mbrojtje nga tharja dhe për shkëlqim.

6.Tharje e kujdesshme. Flokët thithen me peshqir, nuk fërkohen. Më pas thahen me tharëse në temperaturë mesatare, duke drejtuar ajrin nga lart-poshtë.

Ndërsa në Evropë salloni është vendi ku priten flokët, në Japoni sallonet shpesh specializohen në kujdesin e flokëve. Kujdesi për lëkurën e kokës është një nga ritualet më të kërkuara. Trajtimi përfshin: pastrim të thellë, masazh të butë, aplikim serumesh dhe vajrash, aromaterapi dhe ndonjëherë edhe një “çaj përmbyllës”, një filxhan çaji matcha pas trajtimit.

Përbërës natyralë dhe sekretet e flokëve japonezë

Kujdesi japonez për flokët është i paimagjinueshëm pa përbërës natyralë që trashëgohen brez pas brezi. Çdo produkt nuk është thjesht kimi, por koncentrat i natyrës, kujdesit dhe traditës.

Vaji i kamelies. Simboli thelbësor i kujdesit japonez. Aplikohet në maja ose në gjithë gjatësinë pas larjes për hidratim, forcim dhe shkëlqim. Shpesh masazhohet në lëkurën e kokës para gjumit për të përmirësuar qarkullimin dhe përshpejtuar rritjen.

Uji i orizit. Përdoret për shpëlarje ose shtohet në shampo. I pasur me aminoacide, forcon strukturën e flokut dhe e bën atë të lëmuar e elastik. Kjo praktikë daton që nga kohët e lashta.

Ekstrakte bimore dhe frutash. Produktet japoneze shpesh përmbajnë ekstrakte sakure, çaji jeshil, pjeshke dhe algash deti. Çdo përbërës ka funksionin e vet: ushqen, mbron nga rrezet UV, jep butësi dhe aromë. Formulat e buta, pa sulfate agresive, ruajnë ekuilibrin natyror të flokëve.

Zakonet e përditshme të grave japoneze

Japonezet nuk nxitojnë, çdo hap është i menduar me kujdes.

Krehja para larjes. Para kontaktit me ujin, flokët krehën me kujdes për të hequr papastërtitë dhe për të shpërndarë vajrat natyralë.

Krehra prej druri. Shpesh prej shkoze, me dhëmbë të lëmuar, nuk elektrizojnë flokët dhe nuk dëmtojnë majat.

Shpeshtësia e larjes. Është e rrallë që flokët të lahen çdo ditë; zakonisht 1-2 herë në javë, më shpesh në verë, më rrallë në dimër për të ruajtur lagështinë.

Masazhi i kokës. Disa minuta masazh me vajra ose serum është pjesë thelbësore e ritualit të mbrëmjes.

Mbrojtje nga nxehtësia. Edhe kur përdorin tharëse apo mjete stilimi, japonezet përdorin mbrojtje termike.

Rituale të vogla bukurie. Kujdes për furçat, spërkatës aromatikë dhe kontroll i lagështisë së ajrit në ambient.

Çdo ditë është një ritual i vogël që krijon flokë të shëndetshëm dhe paqe të brendshme.

Kujdesi për flokët në Japoni nuk është ndjekje mode apo trendesh. Është art që lidh trupin me shpirtin. Flokët e bukur janë rezultat i vëmendjes, kujdesit dhe respektit për veten.