Britania u trondit mbrëmjen e së shtunës nga një sulm masiv me thikë në një tren me destinacion Londrën, ku nëntë persona mbetën të plagosur rëndë.
Ngjarja u regjistrua në trenin e linjës LNER, pak pas nisjes nga stacioni i Peterborough. Sipas Policisë së Transportit Britanik, një 32-vjeçar britanik është arrestuar si autor i dyshuar, ndërsa një tjetër person i ndaluar u la i lirë. Hetuesit konfirmojnë se deri tani nuk ka prova që sulmi të lidhet me terrorizmin.
Si ndodhi ngjarja
Dëshmitarët treguan se panë pasagjerë që vraponin të frikësuar dhe përpiqeshin të barrikadoheshin në tualetet e trenit, ndërsa sediljet ishin të mbuluara me gjak. Treni u ndal emergjentisht në stacionin Huntingdon, ku policia e armatosur ndërhyri dhe arrestoi autorin brenda pak minutash.
Një anëtar i stafit të linjës hekurudhore, i cili tentoi të neutralizonte sulmuesin, është në gjendje kritike. Sipas policisë, veprimet e tij “shpëtuan jetë”.
Reagimet
Kryeministri britanik Keir Starmer e cilësoi ngjarjen “thellësisht shqetësuese”, duke falënderuar forcat e rendit për reagimin e shpejtë. Edhe Mbretëresha Camilla dhe Mbreti Charles shprehën ngushëllimet për viktimat.
Hetimet
Në vijim, policia po heton motivet e autorit, ndërsa përjashton skenarin terrorist. “Nuk ka asgjë që sugjeron terrorizëm në këtë fazë,” tha polici John Loveless.
Sulmet me thikë në Britani janë rritur vitet e fundit, me mbi 51 mijë raste të regjistruara në Angli dhe Uells gjatë 12 muajve të fundit, sipas statistikave zyrtare.
Top Channel
Burimi: top channel
