Në samitin për klimën COP30 që po mbahet në Brazil, draft-marrëveshja finale është zbehur ndjeshëm pas heqjes së çdo referimi ndaj “lëndëve djegëse fosile”, duke nxitur përplasje midis vendeve pro-ambicioze për klimën dhe atyre prodhuese të naftës.
Nga draft-marrëveshja finale në Samitin e OKB-së për klimën, COP30, që po mbahet në Brazil, është hequr çdo përmendje e lëndëve djegëse fosile.
Çdo referencë ndaj termit “lëndë djegëse fosile” është larguar nga drafti përfundimtar, i cili aktualisht është në proces negociimi dhe po hyn në fazën e tij finale.
Draft-marrëveshjet në takimet e gati 200 shteteve anëtare zakonisht kalojnë përmes shumë rishikimeve, pasi të gjitha palët duhet të pajtohen që teksti të miratohet.
Brazili, nën drejtimin e presidentit Luiz Inacio Lula da Silva, së bashku me disa vende të tjera, përfshirë edhe Mbretërinë e Bashkuar, kërkojnë që samiti t’i obligojë shtetet me veprime më të shpejta dhe më të fuqishme për të zvogëluar përdorimin e lëndëve djegëse fosile. Një version i mëparshëm i tekstit përmbante tre opsione për arritjen e këtij synimi, por pas kundërshtimeve — kryesisht nga vendet prodhuese të naftës — këto formulime janë hequr nga drafti aktual.
Një burim anonim i afërt me negociatat ka thënë se Arabia Saudite dhe disa vende arabe po e bllokojnë marrëveshjen lidhur me lëndët djegëse fosile, ndërsa ministrja franceze e ambientit ka deklaruar se procesi po bllokohet nga Rusia, India dhe Arabia Saudite, me të cilat, sipas saj, janë bashkuar edhe disa vende në zhvillim.
Ka reaguar edhe Sekretari i Përgjithshëm i OKB-së, Antonio Guterres, i cili është shprehur se mbetet “shpresëplotë” për rezultate kuptimplota në negociatat e COP30, ndonëse ka pranuar se ka vështirësi serioze në arritjen e një marrëveshjeje të dakorduar mbi veprimet klimatike.
Lëndët djegëse fosile mbeten kontribuuesit më të mëdhenj në ndryshimet klimatike në planet.
Samiti për klimën mbyll punimet të premten.
Burimi: botasot.info
