Sabrina Carpenter ka zënë vendet e larta në listat muzikore me albumin e saj të shtatë, “Man’s Best Friend”, vetëm disa ditë pas publikimit më 29 gusht.
Këngëtarja 26-vjeçare thuhet se e ka regjistruar fshehurazi albumin në pronën private Soho Farmhouse në Cotswolds, ku një natë kushton rreth 5,700 funte (rreth 6,530 euro), duke krijuar një studio të improvizuar për seancat e regjistrimit.
Pavarësisht polemikave që shkaktoi kopertina provokuese e albumit, Official Charts raporton se kënga “Tears” renditet në vendin e dytë, “My Man On Willpower” në vendin e katërt dhe “Sugar Talking” në vendin e gjashtë, shkruan DailyMail.
Sabrina ka ndarë në Instagram pamje nga seancat e regjistrimit dhe detaje të kopertinës, ku ajo shfaqet në një pozë provokuese me një person të veshur me pantallona të zeza, ndërsa fansat shprehin entuziazëm për muzikën e re.
Albumi përfshin bashkëpunime me producentë të njohur, përfshirë Jack Antonoff, dhe kënga kryesore “Manchild” ka arritur vendin e parë në listat Spotify, si në SHBA ashtu edhe globalisht, duke treguar suksesin e menjëhershëm të projektit.
Burimi: botasot.info
