Rutte zotohet të vazhdojë të mbështesë Ukrainën

Sekretari i Përgjithshëm i NATO-s, Mark Rutte, vlerësoi të enjten kontributin në rritje të Islandës në aleancë gjatë një vizite pune në kryeqytetin e vendit, Reykjavik, duke riafirmuar se mbështetja e vazhdueshme për Ukrainën mbetet përparësia kryesore e bllokut.

Rutte, në vizitën e tij të parë zyrtare në Islandë që nga marrja e detyrës në vitin 2024, u takua me Kryeministrin Kristrun Frostadottir dhe Ministrin e Jashtëm Thorgerdur Katrin Gunnarsdottir përpara se të inspektonte operacionet e sigurisë së NATO-s në Aeroportin e Keflavikut, një nga objektet kryesore të aleancës në Atlantikun e Veriut.

Duke folur në një konferencë të përbashkët për shtyp, Rutte tha se NATO do të vazhdojë t’i japë përparësi ndihmës ushtarake dhe financiare për Kievin, raportoi agjencia islandeze e lajmeve RUV.

Ai vuri në dukje se “bisedimet e paqes po përparojnë mirë”, duke shtuar se mirëpriti përfshirjen e fundit të Presidentit të SHBA-së Donald Trump në proces, shkruan Anadoly Agency, transmeton KosovaPress.

Ai gjithashtu falënderoi Islandën për kontributet e saj, duke përfshirë financimin për blerjen e armëve për Ukrainën, gjymtyrët artificiale për ushtarët e plagosur dhe pjesëmarrjen në përpjekjet e pastrimit të minave së bashku me Lituaninë.

“Islanda ka dërguar një mesazh të qartë se aleatët qëndrojnë me Ukrainën”, tha ai.

Rutte gjithashtu përgëzoi qeverinë islandeze për angazhimin e saj për rritjen e shpenzimeve të mbrojtjes.

Edhe pse Islanda nuk ka ushtri të përhershme, ajo është zotuar të rrisë investimet në mbrojtje në 1.5% të PBB-së në përputhje me objektivat e NATO-s.

Ai e përshkroi vendimin si “të vështirë, por të nevojshëm” dhe tha se kjo tregonte mbështetjen e qartë të Reykjavikut për aleancën.

Frostadottir tha se vendndodhja gjeografike e Islandës ka qenë prej kohësh strategjikisht e rëndësishme, veçanërisht mes tensioneve në rritje dhe aktivitetit ushtarak në Arktik. Ajo theksoi se vendi ka rritur mbështetjen e vendit pritës dhe po thellon bashkëpunimin me NATO-n.

Më herët gjatë ditës, Islanda nënshkroi një letër qëllimi për një projekt zhvillimi të financuar nga NATO në Helguvik, që përfshin zgjerimin e objektit të magazinimit të naftës të aleancës dhe ndërtimin e një port 390 metrash. Investimi, me vlerë rreth 10 miliardë krona islandeze, pritet të forcojë si infrastrukturën e NATO-s ashtu edhe ekonominë lokale.

Rutte u takua gjithashtu me anëtarë të Komitetit të Punëve të Jashtme të Parlamentit Islandez dhe Seksionin Islandez të Asamblesë së NATO-s para se të përfundonte vizitën e tij.