Rugova: Partitë opozitare ranë në grackën e Kurtit, VV kërkon zgjedhje të reja

Anëtari i LDK-së dhe ish-deputeti, Naser Rugova, ka vlerësuar se me moskonstiuimin e Kuvendit të Kosovës, të 120 deputetët e legjislaturës së nëntë kanë rënë nga provimi.

Rugova ka theksuar se deputetët e zgjedhur kanë humbur kredibilitetin te qytetarët e Kosovës.

“Kjo legjislaturë e zgjedhur e dalë nga zgjedhjet e 9 shkurtit të këtij viti ka rënë në provim komplet të 120 deputetët. Kanë rënë në provim sepse nuk ka arritur ta konstituojnë Kuvendin e Kosovës, tempullin e demokracisë. 54 dështime që jemi bërë për Librin Ginis. Thjesht këta njerëz të zgjedhur e kanë humbur kredibilitetin dhe iu ka rënë dukshëm besueshmëria te trupa elektorale apo tek qytetari I  Kosovës”, ka thënë ai.

Sipas tij, partitë politike opozitare, duke mos e votuar për konstituimin e Kuvendit, kanë rënë në grackën e kryeministrit në detyrë, njëherësh kryetar i Lëvizjes Vetëvendosje, Albin Kurti.

“Ka qenë dashur që me një marrëveshje politike vetëm ta bëjnë konstituimin e Kuvendit. Në këtë kontekst unë e kam thënë në këtë studio që partitë politike opozitare kanë bërë një gabim, kanë rënë në grackën e zotit Kurtit se është dashur që ta konstituojnë Kuvendin dhe që nga ajo ditë kur do të kishte ndodhur kjo Kurti do të binte dhe do të sfidohej seriozisht a I ka 61 vota për formimin e qeverisë së re apo jo”, ka vlerësuar Rugova.