109
Shkup, 1 janar – Kryeministri Hristijan Mickoski sot konfirmoi se në prill, me pensionin e marsit, do të ketë një rritje lineare të pensioneve.
Në një deklaratë për mediat të dhënë sot në Kavadar, kryeministri tha se të dhënat statistikore mbi nivelin e varfërisë dhe koeficientin gini justifikojnë politikën e një rritjeje lineare të pensioneve.
“Në prill, me pensionin e marsit, do të ketë një rritje lineare të pensioneve, kështu që po vazhdojmë me atë politikë. Parametrat e fundit statistikorë të lëshuar nga Enti Shtetëror i Statistikës mbi nivelin e varfërisë dhe koeficientin gini vetëm sa e justifikojnë më tej politikën e Qeverisë për një rritje lineare të pensioneve. Duam të ulim nivelin e varfërisë në mesin e këtij grupi, dhe kështu të ulim koeficientin gini, që nënkupton një shpërndarje të pabarabartë të të ardhurave midis grupeve të ndryshme të qytetarëve. Duhet të pranoj se po ecim mirë në atë drejtim”, tha Mickoski.
Lidhur me koeficientin gini, Mickoski tha se jemi më të mirët në rajon dhe mbi mesataren evropiane, dhe lufta kundër varfërisë, theksoi, është një nga qëllimet kryesore të Qeverisë.
