Rëndohet bilanci i viktimave nga sulmet ruse në Kiev, 145 persona të plagosur

Numri i të vdekurve nga një seri sulmesh ruse me dronë dhe raketa në Kiev është rritur në 15, ndërsa 145 persona janë plagosur, përfshirë 14 fëmijë.

Sipas Ministrisë së Brendshme të Ukrainës një djalë 6-vjeçar dhe nëna e tij janë konfirmuar ndër viktimat. Zyrtarët lokalë thonë se sulmet goditën më shumë se 24 lokacione në disa lagje të kryeqytetit dhe rrëzuan një bllok apartamentesh banesore, duke shkaktuar viktima masive dhe panik qytetar.

Kryebashkiaku Vitali Klitschko tha se ky ishte sulmi me më shumë fëmijë të plagosur brenda një nate që nga fillimi i luftës në shkallë të plotë në shkurt 2022.

Sipas forcave ajrore të Ukrainës, Rusia lëshoi 309 dronë dhe tetë raketa gjatë natës. Edhe pse një pjesë e mirë u kap nga mbrojtja ajrore, shumë të tjera arritën objektivat duke shkaktuar dëme të rënda infrastrukturore dhe civile.

Këto sulme ndodhin vetëm disa ditë pas ultimatumit të Presidentit Donald Trump ndaj Vladimir Putinit, duke kërkuar armëpushim deri më 8 gusht, përndryshe kërcënoi me sanksione më të ashpra.