BBC i ka kërkuar falje presidentit të SHBA, Donald Trump për episodin e emisionit Panorama, ku pjesë të ndryshme të fjalimit të 6 janarit 2021 ishin montuar në mënyrë të tillë që krijoi përshtypjen se ai kishte bërë thirrje për dhunë. Transmetuesi britanik deklaroi se programi nuk do të transmetohet më, por hodhi poshtë kërkesën e presidentit amerikan për kompensim financiar prej 1 miliard dollarësh.
Trump kërcënoi BBC-në me një padi prej 1 miliard dollarësh nëse nuk kërkonte falje dhe e kompensonte atë. Skandali çoi në dorëheqjen e drejtorit të përgjithshëm Tim Davie dhe shefes së lajmeve Deborah Turness. BBC njoftoi se i ka dërguar Trumpit një letër zyrtare dhe se kryetari i BBC-së, Samir Shah, ka kërkuar personalisht falje në një letër drejtuar Shtëpisë së Bardhë.
Në përgjigjen për avokatët e Trump, BBC argumenton se nuk ka bazë për padi, duke theksuar se dokumentari nuk u transmetua në SHBA, se presidenti nuk pësoi dëm pasi u rizgjodh më pas, se montazhi nuk ishte i qëllimshëm dhe se ishte një klip 12-sekondësh brenda një dokumentari 1-orësh. BBC shton se opinioni mbi çështje politike është i mbrojtur fort nga ligjet amerikane të shpifjes.
Skandali u thellua pasi Daily Telegraph zbuloi një tjetër montazh të ngjashëm të fjalimit të Trump, transmetuar në Neësnight në vitin 2022. Edhe ky material shkaktoi kritika për montazh të gabuar, ndërsa ish-shefi i stafit të Trump, Mick Mulvaney, tha se videoja kishte bashkuar fraza të ndara të fjalimit.
BBC deklaroi se po e shqyrton çështjen dhe se mbetet e përkushtuar ndaj standardeve më të larta editoriale. Nga ana tjetër, ekipi juridik i Trump akuzoi BBC-në për “model shpifjeje” ndaj ish-presidentit. Ndërkohë, lideri i Liberal Demokratëve, Ed Davey, i bëri thirrje kryeministrit britanik të ndërhyjë për të mbrojtur pavarësinë e BBC-së.
Burimi: opinion.al
