Shkup, 24 korrik – Pas refuzimit të kërkesës për debat në Kuvendin e Maqedonisë së Veriut për ndihmë humanitare ndaj Gazës, ka reaguar deputeti dhe bashkëpropozuesi i rezolutës, Salih Murat, duke e quajtur këtë vendim si një “kollaps moral” dhe “turp historik” për përfaqësuesit politikë, transmeton Zhurnal.mk.

“Nga 120 deputetë, vetëm 16 votuan pro ndihmës humanitare për Gazën. 16 deputetë përballë mijëra fëmijëve që po vdesin nga uria dhe mungesa e ilaçeve. Rezoluta kërkonte vetëm ndihmë elementare: ushqim dhe barna për civilët – asgjë më shumë, asgjë më pak”, thekson Murat në reagimin e tij publik.

Ai shton se 77 deputetë zgjodhën të heshtin, duke e konsideruar këtë një akt të çnjerëzimit dhe një devijim të thellë nga vlerat mbi të cilat është ndërtuar shteti.

“Maqedonia është ndërtuar mbi tradita antifashiste. Por sot, deputetët tanë zgjodhën anën e gabuar të historisë. Humanizmi selektiv nuk është humanizëm – është hipokrizi. Fëmija i uritur në Gazë nuk është më pak tragjik se ai në çdo cep tjetër të botës”, deklaroi Murat, përcjell Zhurnal.mk.

Ai përfundon me një mesazh të ashpër: “Turp t’ju vijë. Historia do t’ju mbajë mend për mënyrën se si reaguat kur njerëzimi u vu në provë. Maqedonia meriton më mirë se ky falimentim moral.”

Burimi: zhurnal.mk