Rasti i Ervis Martinajt, Karamuço: Nuk ka asnjë provë që ka vdekur

Eksperti i kriminalistikës, Ervin Karamuço, komentoi kërkesën e babait të Ervis Martinajt për shpalljen e djalit të tij të zhdukur si i vdekur.

Sipas Karamuços, në raste të tilla personi kërkohet fillimisht si i zhdukur dhe vetëm nëse gjendet trupi ose një provë biologjike, si ADN-ja, mund të shpallet zyrtarisht i vdekur.

“Kjo nuk do të thotë që personi ka vdekur në mënyrë kategorike. Ka pasur raste kur njerëz janë gjetur edhe pas 20 vitesh. Juridikisht mund të shpallet i vdekur, por faktikisht shteti nuk ka dhënë asnjë përgjigje,” tha eksperti.

Ai shtoi se autoritetet nuk kanë gjetur asnjë gjurmë, ADN apo provë që të çojë drejt ndonjë autori. “Janë bërë kërkime kudo, por pa rezultat. Deri më tani kemi vetëm gojëdhëna dhe legjenda për atë se kush mund ta ketë vrarë apo pse. Asgjë nuk është e provuar me fakte,” përfundoi Karamuço.